في البلكونة ذكريات وحكايات من قديم الزمان، في البلكونة شريان واصل بين الجيران، في البلكونة علم مصر بيرفرف ويقول مصر هي العزة ودايما في حفظ الله، في البلكونة قعدة بابا وماما في العصرية مع كوباية الشاي وحكاوي بالحب مليانة تفاؤل وخير، في البلكونة خرج القلب الطيب القلقان على جاره عشان مش باين من إمبارح، في البلكونة أصحاب العمر والرغي شغال للصبحية وكأن عدى ثانية مش يوم بليلة، في البلكونة الكاسيت شغال بحليم وسومة علي الصوت ومتعنا معاك، في البلكونة صباحك هنا عرفتي آخرالأخبار عزيزة تعبانة بينا نتقابل عندها نساعدها ما الجار للجار.
في البلكونة السهرة الحلوة مع الأخوات والطاولة والدومينو وأحلى الأوقات، في البلكونة زغاريد وتهاني لنجاح ابن الجيران في الثانوية وكأنه ابني اللي من دمي، في البلكونة رمضان على وصول شد الحبل ننور شارعنا لشهرالخير، في البلكونة أول حب وأول طلة لأم عيون عسلية اللي خطفت قلبي وبقت أم عيالي، في البلكونة حكاوي كتير ملهاش نهاية، في البلكونة تلاقي الأصالة والجدعنة والشهامة وشارع كله عيلة واحدة متجمعة.
في البلكونة تختفي المسافات جاري هو أخويا ووصية الرسول، مين فينا ملوش ذكريات في البلكونة اللي عشنا فيها أجمل اللحظات اللي اختفت بحكم مشاغل الحياة والخوف من بعض وتغيير النفوس وإن جارك ده سوس مدسوس خلي بالك من عيونه لحسن تلوص.
وجت الكورونا عشان تنضف النفوس وترجع للبلكونة هيبتها وحقها.البلكونة شريان التواصل عبر العصور ،كل الجيران طلعوا البلكونة وغنوا لتخفيف الحمل على بعض ولنسند بعض في محنتنا كلنا.. رجعوا للبلكونة قلبها بعد ما داسوا على حقها، رجعوا للبلكونة هيبتها بعد هجرها.. والأجمل إن فيه جيران اتعرفوا على بعض في البلكونة بعد عمر وشوشهم فيه كانت متغربة.. البلكونة وجمال البلكونة شريان التواصل المجتمعي عبر العصور.
