جريدة الاخبارية سياسية::شاملة::مستقلة
مقالات مشابهة
– محموووووووود انت نايم ياحبيبي؟
– ايوه مخمود راجع تعبان م الشغل ومخمود!
– هتتخمد من غير ماتقولي هابي فلانطاين يا حبيبي؟
– يا ستي في عرضك أبوس أيدك سيبيني في حالي دلوقتي وليكي عليا بكره الصبح أقولك هابي فلانطاين علي دماغك ودماغ اليوم اللي عرفتك فيه!
– للدرجة دي بتحبني يا محموووود؟
– واكتر بكتير بس سيبيني انام دلوقتي!
– طب علي فكرة يا حبييي الراجل اللي جنبنا جاب ورد لمراته يا محمود!
– طب وايه المطلوب مني دلوقتي؟
– تخليه يجيبلي زيها يا محمود!!
– حاضر نامي دلوقتي وبكره الصبح اكلمهولك!
– انام من غير ماتعشي يامحمود،،نفسي في كام بيضة مسلوقة ياحودة !
– سيبيني انام انا في عرضك وبكرة الصبح اجيبلك كرتونة بيض بحالها!
– كرتونة بيض بحالها ليه يامحمووووود تكونش بقيت حرامي قد الدنيا يا حودة؟!
– يا ستي أسرقها ولا اخطفها ميخصكيش بس سيبيني انام دلوقتي!
– حاضر بس علي فكرة يا حبيبي الراجل اللي جنبنا جاب لمراته النهاردة قزازة زيت!
– وايه المطلوب مني؟ أخليه بكرة يجيبلك قزازة ورد وبوكيه زيت كمان؟
– ياريت تقوله يجيب قزازتين يا حبيبي مش واحدة!
– حاضر حاضر بس أبوس أيدك سيبيني انام دلوقتي!
– بمناسبة البوس عايز أقولك حاجة مهمة ياحودة،،الراجل اللي جبنا كان بيبوس مراته من شوية؟
– ودي أعمل فيها دي كمان؟!
– ياريتك تعمل زيه يا محموووود!!
– طب وتفتكري هي ترضي؟!
– تحب اسألهالك يا حبيبي؟
– يا مثبت العقل والدين يارب،،ياست حلي عن نافوخي وياريت تجيبلي الاول كيسين تلاتة من القطن الطبي؟
– ليه كفي الله الشر يا محموووود مالك وعايز القطن لأيه يا محمود
– عايز اسد بيه وداني عشان اعرف انام لغاية الصبح من غير ما سمع صوتك خالص!!
– واجيبلك ميكروكروم مع القطن يا حبيبي؟!
– لا هاتيلي فنجان قهوة
– حاضر يا حبيبي سادة ولا سكر زيادة زيك يا حودة؟
– سادة سادة بس قوام دماغي خلاص هتتفرتك!
– طب ما عملهالك بسكر زيادة يا محموووود؟!
– اللهم طولك ياروح،،خلاص روحي اعمليها بسكر.
– بس احنا معندناش سكر يا محمود،،مقاطعينه من ساعة ما غلي ياحبيبي ،،هعملهالك سادة بقي وخلاص!
– ماشي اعمليها سادة اعمليها حتي بتراب بس الحقيني بيها اعملي معروف!
– بس احنا أصلاً معندناش قهوة يا محمود اجيبلك سلطة ياحبيبي؟!
– هو الراجل اللي جنبنا مجابش النهاردة سكر لمراته؟
– كويس فكرتني يا حبيبي،،دقايق وارجعلك
– رايحة تستلفيلنا ملعقتين سكر وملعقة بن؟
– لا رايحة اسخنلك السلطة يا حبيبي !
– يا رب خلصني من الولية دي !
– علي فكرة يامحمود الراجل اللي جنبنا جاب فرخة صاحية لمراته ياحبيبي!
– بتفكري في ايه يعني ؟!
– تحب اسرقهالك يا حودة؟!
– علي آخر الزمن عايزة تأكلينا حرام،،طب منظرنا إيه الصبح لما الجيران يكتشفوا ان فرحتهم اللي هي فرحة عمرهم ضاعت ويطلعوا كلهم يدوروا عليها؟!
– ما حنا هنطلع ندور معاهم،،خليك حويط يا حودة!
– يعني قصدك نقتل القتيل ونمشي في جنازته؟!
– باموت فيك وانت نبيه كده يا محموووود!
– روحي يا شيخة الهي تموتي فعلا بس مش فيا!!