عم عبدالشفيع جارنا كان زارع خط باميه في ارضه ومع اول قطفه زوجته جابتلنا طبق مليان اعطيته لحني(ستي) مريم وقلتلها ده من عمي شفوعه
قالت ربنا يطعمه ومايحرمه وعاده ماتنقطع وكل سنه وهو طيب
وملتلها الطبق جوافه عشان مش من العاده ترد طبق الهديه فاضي
ومن عادة حني كانت تقولى
فرقها تفوح واوعى بالسر تبوح
امي نقعت الفول المدشوش وخلطته علي الباميه وعملت حلة طبيخ ولا اروع
وفي المغرب اعطت اختي طبق منه وقالتلها روحي لجارتنا حنك معزوزه وديلها طبق الطبيخ ده عشان بتحب الباميه البدريه ورجعت اختي بطبق من عند حني في ايد مليان رز بلبن في وسطه سمن بلدي والايدالتانيه بحلاوه نوجه
كنا عايشين في زمن موده وحن ورحمه
السوق كان يوم السبت حني اللي هيا ستي كانت تمسك قسم (مناب) بنتها اللي متزوجه في النجع جنبها وتيجي الصبح بدري يوم الاحد تولع السبرتايه وتسخن الرز والشوربه وتفطر بيه
إخوالي كان لهم ارض جنب ارضنا لكن بينا وبينهم في السكن 4كيلو
حني عاليه ام امي تيجي مخصوص يوم الاحد عشان تقابل امي علي الترعه القبليه وقسمها ملفوف في رغيف في كيس غير الحلويات والفاكهه
كنا بننتظر يوم الاحد عشان هدية خوالنا كنا نستبشر بقدوم الحن والجد
كنا نفرح بهداياهم البسيطه
يااااه لسا فاكر ستي وهيا بتقول لامي القونصه دي لراقي عشان عرفاه بيحبها
لسا طعم الفلفل والملح بتاعها في فمي مع مرور 30سنه علي وفاتها
فاكر قرطاس الحلاوة الطوفي بتاع جدي عبيده وجدي مبروك مسعود
فاكر
ريحة المحشي بتاع جارتنا البحريه حني عطايا وهيا بتسويه علي الكانون وابنها عليوه جايبلنا طبق ابيض والمحشي واخد اللون الاحمر من الشطه والصلصه والخضره في يوم شتا ومطر
كنا نستشعر بدفئ القلوب اللي تحس ببعض
وكأن الناس مش عايزه تاكل اكله حلوه لوحدها مش عايزين يفرحو لوحدهم
حاسين ان اللقمه هتكون حلوه بقسم الغايب
حاسين الزرعه هتكون مبروكه بهدية الجيران
مين من الجيران كان يشتري اللبن اوالجبنه
كان في حاجه اسمها عيب
عيب جارك يتحرم من البياض يتحرم من الجبنه القريش واللبن الرايب والحليب والسمنه
الستات كانت تحس بعض
ايوه يحسوا ببعض ويشكوا لبعض وهما بيغسلوا المواعين علي شط الترعه ويملو البلاليص ميه من البير
ماكنش فيه فروقات اجتماعيه
يتبادلو المداس والهدوم
الغيطان مليانه خير يعم علي الكل من باميه لخبيزه لملوخيه وكركديه وفجل وجرجير وشبت وجلوين وكسبره كل ده كان يتزرع علي الجسور ماكنش بيتباع
كان بيتهدي
اتربينا ان العمه لها حق ولها مناب في بيت ابوها لها قدسيتها ووقارها
اتربينا ان السعاده الحقيقيه
هيا ان تراها في عيون الاخرين لا ان تحققها لنفسك فقط
واكبر اللذات لذة الاحسان الي الاخرين
عرفتوا ليه احنا ماعتش سعداء
بقينا نحتكر كل شئ لنفسنا
ماعتش بنحس ببعضنا
بقا لسان حالنا نفسي نفسي اولاً
