الرضا والقناعة والتصالح مع إختياراتك مهم جدا جدا عشان تكملى باقى عمرك وانتى مبسوطة .
لما تختارى إنك تكونى أم أكتر ماتترقى فى منصبك أوتتركى بصمات فى شغلك ، لما تختارى تقفى فى ضهر جوزك وتدفعى عجلة نجاحه بكل قوتك أكتر مانجمك يلمع وتكونى نشطة إجتماعيا ،لما تختارى كفة أسرتك تعلى فوق كفة نجاح شخصي خاص بيكى وقتها لو معتبرتيش ده نجاح وتألق فعلى ليكى يبقي هتتعبى جدا ..
إنتى نتاج إختيارات كتير جدا إخترتيها . ماينفعش بعد ما تحققى أهدافك من كل اختيار إخترتيه بحب وتشوفى النتيجة قدام عيونك
زوج لامع معروف أولاد ناجحين ومرموقين بيت مستقر ناجح وقوى ،
ماتستمتعيش بالنجاح ده وتحصديه معاهم .

أوعى تقفى لحظة تفكرى وأنا فين بطموحات شخصية مؤجلة ونجاحات خاصة اتمسحت من الذاكرة وحل محلها نجاح جماعى ؟!
اوعى تبصي لحاجات بكامل إرادتك لم تعد عليها توقيعك ( الشخصي) وتنازلتى عنها بطيب خاطر لمن اخترتى ان تكونى دافع لنجاحهم وليهم .
اوعى تشوفى اللى عملتيه قليل عشان توقيعك مش شخصي
لالا لا صدقينى الجمال كله مش بيخرج غير من مخرج محترف واقف ورا كاميرا محدش شايفه من الجمهور وهو بيتعب فى شغله بس كل اللى فى اللوكيشن عارفين جدا انه بدونه مفيش نجاح وف نهاية الفيلم الجمهور هيقرا اسمه بعد اكتمال القمر ويعرف مين المبدع .
صدقينى انتى اعظم من انك ماتشوفيش نجاحك وتصقفى لنفسك .
نجاحك فى ادارة كيان أهم وارقي بكتير جدا من تفرد إسمك بنجاح فى كيان انتى وحيده فيه.
ماتبصيش فى مرايتك عشان تشوفى وصلتى فين بصى فى عيون حبايبك هتشوفى نفسك ملكة وعظيمة وهتعرفى ان اختياراتك كانت صح وحصادك مميز وهتعرفى اد ايه انتى نجحتى ونجحتى جدا ..