قاعد يستنى الوحى وينده على جبريل
سِيدنا المختار .. كان لما يغيب فى الغار
يقلق أصحابه عليه
يخرج وعلامة الوحى ( بريق ) فى عنيه
والعرق الدافى الصافى على الخدين
فرحان وحزين
فرحان على ( سوره ) جديده من القرآن
وحزين على ناس رغم الإسلام .. عابده الأصنام
خارج م الغار مرجوف
ملهوف على إنه يِوصل قُول الله لجميع الناس
جبريل طَمِنُه ع الحال
وبأن الله هايراعى مسيرتُه لآخر يوم
سَيِّدنا مُحمد بص بشوق ع القوم
ووصل لخديجه .. خديجه الطاهره بتحضن فيه
وتبوس فى إيديه .. وتبوس فى عنيه ..
وتبوس فى الشال
الحر شديد .. ويقول بردان .. تجرى تغطيه
وتطمن قلبه .. يحاول تانى يعيد ..
كل اللى اتقال من روح جبريل
بَلّغُه سلامات الله وبأنه ختام
وبأنه هايفضل طول العمر .. سلام على أرض الكون
وبأن بفضل الله هايكون فى العون
سيدنا محمد باصص ع الأصنام
مستغرب جدا من أفعال القوم
لكن مطمن إن هاييجى اليوم
ويآمنوا برب كريم قيوم
يخرج م الغار يتلفت ع الأصحاب
ويشد الشال على كتفه يبص لقمر الليل
أو شمس اليوم
بين الصُحيان والنوم ..
يوصل لسريره عشان يرتاح
وينام .. ما ينام
ويقوم من نومُه الصاحى ويخرج بره البيت
يسند على أول صاحب صادفُه ويمشى معاه
ويردد فى القرآن
تنزل دمعاته على الخدين
الصاحب يبكى بصوت
سيِّدنا محمد يسحب إيده .. يطبطب فوقه ويبكى معاه
خوفاً م الله يا حبيب
يا طبيب الأمه وروح الكل وشمس الضوء
بيبص لفوق .. يلمح فى سحابه بتنده ليه
وكأن الشمس الطاهره بشوق .. نزلت فى عنيه ..
تتوضى بدمع شريف
ماشى سيِّدنا محمد .. كِترو الصحبه معاه
بيقولوا كلام الله بحنين
ويبصوا عليك يا أمير .. يِِلاقوك سرحان
جوه الملكوت .. داخل ومعاك قرآن
ويجيلك صوتهم دافى كأنه شعاع ملهوف
مابقاش للخوف يا حبيبى مكان
كتروا الكفار فعلا حواليك
بس انت معاك أصحاب ..
الواحد فيهم يِوزن ميت مليون
الله فى العون
والكون مشتاق بينادى عليك
تدخل بعنيك من تانى فى قلب سحابه ..
فتشتى نجوم
تنده على قوم حواليك مشدود
” يا عباد الله .. الله موجود
بيجود على كل عباد الله لو بصوا عليه
الكافر بكره يعود للنور “
تقعد يا رسول الله بحنان
تسند على شجره .. فتقعد كل الناس حواليك
تسجد لله .. يسجدوا وياك
مش وقت صلاه
لكنك دايما تسجد فجأه على الطرقات
وتبات يا رسول الله بوضوء
جواك الشوق لله بركان
تسند على شجره بتدبل .. نسمع صوت النور ..
بيحرك فيها فتصبح ألف جنينه بتعزف قوت
وتفوت على كل بيوت الناس والباب مقفول
تتفتح ليك كل الأبواب
وان غاب البدر بتصبح ألف قمر على سطح الشوق
ويبص الناس لعنيك .. يلاقوها دموع
حزنان .. موجوع
مرتاح مسموع
وكلامك واصل طول الأرض وعرض الأرض بعون الله
بتبص على القاعدين .. تعرفهم واحد واحد ..
تنده كل صديق بالإسم يا عبد الله
مفرود فى طريق مفرود
وجميل الوجه وصوتك نور
ما تحبش لون الزور
كالريح الطاهره فى كل مكان
مُرسل يا حبيبى من الرحمن
مرسل لنجاة الكون م الكُفر الفارد ألف جناح
على مكه وكل زوايا الأرض وروح الناس
بتساعد أى رفيق ينداس
قرآن ع الأرض بيمشى عشان الكل يشوف
قلبك ملهوف دايما على أى حبيب بيغيب
الشوك يتحول لما تدوسه لجوز الطيب
تعدل فى عبايتك فوق الكتف فيجرى الكل عليك
بيحاولوا يبوسوا إيديك
فتسيب فى إيديك
بعدين بتحط الإيد فى الجيب
تخرج مليانه بقوت
يتبسم ورد السكه وشجر التوت
تتمسح فيك القطط الطاهره تبوس رجليك
تتبسم تانى .. تبص على السموات
تُفرك فى إيديك ..
العرق الطاهر لسه مبلل ليك فى التوب
المِسك بريحته يبان على بُعد الشوف
تشرب م القله وكل ما تشرب تانى تزيد
عشرين تلاتين تسعين يشربوا وياك
وما زال فى القُله مكان لآلاف
الله .. يا شموس الحب على البردان
الله ع الوحى بيوصل ليك وياه قرآن
الله الله .. الغايب بان .. وصبح بركان
وصبح عنوان للدين
السنتى خلاص أصبح فدان
وبيبان الدنيا هاتفتح للعاشقين
يا كحيل العين يا يتيم .. يا شعاع مبروك
ما قدرشى فى يوم .. حتى الكارهين ينسوك
ولا قدروا فى يوم ..
يطفوا فى الشمس الحاضنه عنيك
يا جميل الهيئه يا ضىّ ما زال بيهز الروح
كان صوتك جوه الليل مبحوح من كُتر نداك
كان قلبك رغم النور مجروح
ساعة ما الصمت أمر بأذاك
ساعة ما شربت ( الحنضل ) م الكفار
ودعيت للكل وعمرك يوم ما دعيت على شئ
تقعد .. فتقرب ليك السما ..
تتملى فى حسنك ويا نجوم الليل
ترفع فى إيديك .. تصبح قناديل
بتنور بالقرآن
ويدوَّر قلبك ع التايهين
يا حبيب الكون يا أمين .. يا سراج م النور
وتفوت على كل الناس القاعده بتستناك
تتهجى ضياك ساعة ما تفوت
ويموت الصاحب .. تبكى عليه .. تخرج وياه
وتردد آيه وراها الآيه وتحضن فيه
وتسيبه فى قلب القبر وترجع ويا الناس
الناس ماشيين حواليك
ولسانك رايح جاى
بيردد فى الأحاديث الطاهره وينصح فى الصاحيين
بيقول ع الموت .. بوابه لعالم كله جديد
يسلم للدنيا لسانك ألف جناح
ورياح إلهيه بتقلع نخل الخوف
ترجع لخديجه حزين
( الوحى اتأخر ليه ؟
جبريل يا خديجه وحشنى بشكل غريب
مشتاق لآيات الله )
تنزل فى آيات المولى عليك .. ترتاح
ترسم مفتاح الحب على الأبواب
جبريل كان غاب .. ورجع بحروف قرآن
دمعك بيبان مع كل سؤال
( إزاى الحال )
بتقولها لكل صديق مغلوب
تستغفر كل دقيقه لرب الكون وتتوب
مع إنك كامل مش موجود فى القلب ذنوب
مع إنك طاهر ” جسم وتوب “
يا رسول مبعوث من رب كريم
زاد التكريم من كل الناس .. حتى الأعداء
بتزيل الداء .. بالرقوه وسوره من القرآن
وتفوت .. أوقات زى البركان
وساعات كنسيم
الله يا كريم .. يا حليم .. يا إمام
الله على نورك وانت فى سكك النور قدام
خدام للكل وحامل للإسلام
وسلام على كل الأمه .. رسول مبعوث
لا حلمت فى يوم بفلوس
ولا لحظه شافوك الناس بتدوس ..
على كافر دايس ع الأصحاب
الباب مفتوح والزاد موجود
ولا شئ خليته يسود ع القوم .. غير الإسلام
البدر بدور
والضى معاك ع الكون بيدور
يِملى الأرواح بكلام الله
ويكون الندهه لصاحب تاه بين الطرقات
تمشى بثبات .. فتزغرد كل الأرض لوقع خطاك
ويسير الكون وياك
فرحان بلقاك .. يا حبيب الضوء
مشتاق والشوق .. باين فى لقاك
تترمى على صدر الشيخ بحنان
تنصح فى شباب الأمه
بصوت مرعوش من كُتر الخوف
الخوف على شرع الله
على ضىّ صبح قنديل فى الليل
على أغلى كتاب مبعوث للأرض عشان ترتاح
يا صباح العاشق والنعناع
لو باع الكافر نفسه .. بتنصح فيه
يا رسول ما نامتشى عنيه
غير لما الصاحب نام
سيف الإسلام .. كان سيف شفاف
بيصيب العاصى ويدخل فى الكفار
سيف الإسلام كان نور مع نار
والدين أزهار ويا الصبار
وانت يا كحيل العين يا رءوف
بتشوف من خلف جدار
وبتسمع حتى أدان الديك خلف الأسوار
وان جار على بيتك ديب
بتمد إيديك لسميع غفار
ماشى والدنيا سكون والليل ستار
وجميع الناس نايمين
وترن خطاك ع الأرض
تغنى الأرض بصوت مسموع
يصحوا الأصحاب .. يتوضوا .. يصلوا وراك
يسهروا وياك
ويقيدوا عنيهم ليك يا حبيب المولى شموع
صوتك مسموع من غير ما تقول
يا نبى .. يا رسول
تدخل ع ( الغار ) .. يتهز الغار
تخرج م الغار .. تمشى الأحجار فى خطاك
والرب معاك مطرح ما تروح
بينادى عليك بالروح يا يتيم .. تسمع فى نداه
تمسح فى دموع العين بالشال
تقعد مع نفسك لاجل تحاسب روحك ع الأفعال
ولا ( فعل ) يا سِيد الكون معووج
ولا حاجه تقول قصرت معاها يا عبد الله
كامل مكمول
وبشير ونذير وسراج ومنير ورسول
وبنسمع قولك مهما يطول القول
وتصول وتجول
فى كلام ربانى حقيقى ومش معسول
نسمع ( نهنهة ) الناس حواليك
مش خوف م النار
خوفاً من غضب الله يا شفيع
علمت الناس ازاى تشترى حسنات من رب الكون
علمت الناس عمرها ما تبيع
ولا لحظه تضيع فى طريق مجهول
يا نبى .. يا رسول
واقف بتصلى أمام الصحبه إمام
ودياب حواليك بيبصوا عليك
وبيأذوا عنيك بتراب وحجاره وجير
أول تغيير كنت انت ضياه
” العبد لا بد يبوس فى تراب مولاه
وانا عبد شكور “
يرجع لخديجه هدومه عليها غبار وعفار
مع طن حجاره من الأندال
على نار الحطب الطاهر تدفى الميّه ..
ويحضن شعرُه ودقنه رزاز
يتنهد .. تنزل دمعه تِبل تراب البيت
فتزهر كل الأرض الحافضه خطاه وتدوب
ويبص من الشباك الخوص .. على كل نجوم الليل
عارفاه بالسنتى نجوم الليل
وبتخجل لما يبص عليها وتفرح جدا بالقرآن
سيدنا العدنان
تَعبان م اللف و م الدوران حوالين القوم
سيدنا العدنان مهموم
من كتر ما قاسى من الكفار
مش طايق فى الأصنام .. لكنه حليم
والرب عليم يا رسول بالحال
يهمس لخديجه بأن الجنه بتبعت ليها سلام
تتبسم جوه عنيه السُود ..
العسلى .. الخضره .. الباينه بمليون لون
برقيها فتهدى دموعها وتحضن فيه
الله على دفء يمامه وصوت الناى
الله على بكره الجاى .. ومعاه حواديت
الله ع الغار ورسول الله داخل ملهوف
قاعد يستنى الوحى وينده على جبريل
الله ع الليل لو كان بيدارى رسول عن عين النوم
بيحوم البوم حواليه ويزوم
يخرج م الغار .. فى حراسة رب عزيز
خطوه ويكون الكل نجوم حواليه
فجأه والدنيا تبص عليه
تتحول كل الناس لهالات تحميه .. من شئ مجهول
الله يا رسول مبعوت بالقوت
والقوت قرآن وياه أحاديث
الله يا جليس الله .. يا جليس جبريل ..
يا جليس العاجز والملهوف
كل الأشياء .. بتشوف دمعك فى سجودك ع الطرقات
بتشوفك لما تطوف ..
على كل بيوت الصحبه الدايبه فى عشقك ليل ونهار
كتروا الكفار .. وأذاهم زاد
وما عادشى خلاص موجود الزاد
ودموعك زادت .. مهما تدارى الجرح لا بد يبان
الهجره ضرورى تكون
بتبص عنيك على مكه تدوب فى دموع
” يا مكه هافارقك .. بس لا بد يكون فى النِيّه رجوع
يا أغلى بيوت الله “
الموكب ماشى بدونك وانت معاك صِدِيق
بيبان للكل بريق
توصل لمدينة نور على ناقة خير
وتحط الناقه بشكل غريب على بيت موصوف
مأموره الناقه فى كل خطاوى الرحله بشئ
فرحانه الناس بقدومك تجرى عليك أنهار
الناس بتزيد .. والخير بيزيد
ونجوم السما بتقيد للقوم
جربت لأول مره النوم
وارتاح أصحابك م التجريح
الله.. يا فصيح .. يا مريح .. يا مليح
الله يا شعاع الشمس الطاهره لناس ..
كانت محتاجه لحضن فسيح
الله يا مدينه .. مدينه لعبد الله بكتير
بعد ما خلاكى الخطوه الأولى من التغيير
الله يا مدينة النور والخير والزاد
عدد الأصحاب فى وجودِك زاد
والدين هايسود .. أكتر يا حبيب
مع إنه بأول وحى عليك .. ع العالم ساد ،
