حابب أقول للأزواج بعض النصائح إللي بفضل الله ممكن تخلي المشاكل تتحل قبل ما تكبر .
بالنسبة للرجال :
1- لو حصلت مشكلة بينك وبين زوجتك , اوعى تجبرها إنها تسيب بيتها وتروح عند أهلها , أو انت تسيب البيت
طول ما الخلاف بينك وبينها وانتوا الإتنين في نفس البيت , سهل جدا بأمر الله الخلاف يروح وترجعوا مع بعض أحسن من الأول
.
2- لو زوجتك فضلت في البيت أثناء الخلاف , خلى معاملتك وطريقتك زي ما هى بكل إحترام , وبلاش شغل المراهقين إنك تدخل الشقة بالجزمة أو تبهدل حاجة علشان تحرق دمها
خلي الخلاف محصور في عدم الكلام بينكما , غير كدة انت انسان محترم وهى محترمة , والإحتكاك الطفيف بينكما هايخلي الحب يرجع تاني والخلاف يروح والله
.
3- اوعى تمنع عنها الواجب عليك:
الطبيعي كرجل فالواجب عليك الإنفاق بكل صوره , وأي خلاف أيا كان لا يعطيك الحق أبدا في منع واجباتك عن بيتك , زي ما كنت بتصرف في البيت وقت الصلح لازم تنفق نفس القدر وقت الزعل والخلاف , ومحاولة تقليل النفقات لإذلالها هاتقللك من نظرها ومن نظر أي حد يعرف بالأمر ده
فخليك انسان محترم ومتحضر في الخلاف زي ما انت محترم في الاوقات الطبيعية
.
4- لو حماتك من نوعية ” بنتي عمرها ما بتغلط” اوعى تدخلها بينك وبين زوجتك:
صدقني يابني , لو حماتك من النوع ده وحاولت تشتكي زوجتك ليها , فالنقاش مع حماتك ممكن يجيبلك عقم مبكر , وممكن يخليك تكره زوجتك أصلا والمشاكل تزيد أكتر وأكتر , والأفضل تبعد حماتك نهائي عن أي مشاكل بينك وبين زوجتك
.
5- مهما كان الخصام بينك وبينها اوعى تسيب سريرك !
أه ده الهجر الشرعي الصحيح , انت زعلان وهى زعلانة , بس في نهاية اليوم بتناموا على نفس السرير , وماتكلموش بعض عادي , ووالله دي من أعظم النصائح إللي بتخلى الخلاف يروح والقلوب تصفى بسرعة
.
6- لو لا قدر الله لازم زوجتك تروح عند أهلها , يبقى المسمى زيارة
يعني إيه ؟
يعني لو الخلاف بينكما بيحتم إنكم تبعدوا عن بعض شوية وهاتروح عند أهلها , فتتفق معاها بهدوء إنك توصلها كزيارة عدة أيام لأهلها وبلاش تقولوا لهم إن فيه خلاف
واتفقوا إن باب الإتصال بينكما للمعاتبة يفضل مفتوح , وبعد فترة بسيطة هاترجعوا لبعض بأمر الله , لو فضل الاتصال بينكما
.
7- حاسس بفرق ؟
صحيح إحنا كرجال بنحب السرمحة وجو الحرية من القيود , بس لما زوجاتنا بتسيب البيت بنحس بفراغ رهيب وجو قاتم في الشقة , خاصة بعد تعودنا على جو الصحبة والكلام مع الزوجات , وحتى دوشة العيال بتوحشنا لو غابوا عن البيت
.
8- ابعتلها رسالة:
بعد ما تروح البيت وتلاقيه فاضي , جرب أخر الليل ابعتلها رسالة وقولها ” الشقة وحشة جدا من غيرك ” ,,, هاتفرق معاها جدا والله حتى لو ماردتش عليك
وقتها هى نفسها هاتفرح بالرسالة وتبصلها مبتسمة , وتقرر تتقل عليك شوية , وانت دورك تجاريها في تقلها ده شوية علشان تحس بكرامتها وإنك فعلا عايزها وبتحبها
.
9- اوعى تحول المشكلة من بينك وبين زوجتك , لمشكلة بينك وبين أهلها !
لو انت زعلان مع زوجتك فده لا يمنع إنك تفضل كويس جدا مع أهلها , خاصة أبوها
اتصل بيه عادي وسلم عليه , لو حماك عرف إن فيه مشكلة اتكلم معاه بالراحة
هو راجل وغالبا هايبقى فاهم دماغك
لو حماك من النوع العصبي واتعصب عليك بسبب المشكلة بينك وبين بنته , هليك هادي وما تردش عليه بعصبية وإهانة ,,, اعتبره زي والدك واحتمله وكلمه كويس
لأنك يقينا لو عملت معاه مشكلة هتلاقي الخلاف تحول لمصيبة , ويوم ما تحب ترجع زوجتك , هتلاقي نفسك مطالب إنك تراضي حماك الأول , وهاتدخل في دوامة
.
10- الواحدة لما بتتجوز عمرها ما بترتاح في بيت أهلها تاني:
أه دي حقيقة لا تقبل الشك , من حكمة ربنا سبحانه إن البنت بمجرد خروجها من بيت أهلها لبيت الزوجية , نفسيتها بتتأقلم جدا مع بيتها الجديد , وأي مكان تاني بتروح تقعد فيه بتحس إنها غريبة وضيفة تقيلة , حتى لو عند أهلها وحتى لو أهلها ناس كويسين معاها
فتأكد إن اسبوع واحد دي مدة زمنية كويسة جدا لكونها تبقى مهيئة نفسيا إنها تنسى الخلاف وترجع بيتها معاك تاني
فبلاش تسيبها مستنية كتير , وحاول تصالحها بالرسايل والاتصالات بينكما
.
11- ماتخليش مشكلتك معاها لمشكلة بين أهلك وأهلها:
انت ماشاء الله عليك راجل كبير وتقدر تحل مشاكلك بنفسك , فبلاش تدخل أهلك في مواجهة أهلها , لأنه في معظم الحالات بيحصل تجاوزات بين الكبار وشتائم بينهما
وبعد فترة بتبقى إنت وزوجتك نفسكم ترجعوا لبعض , بس أهلك يعارضوك ويقولوا
” إزاي تقبل ترجع لواحدة أهلها شتموا أبوك”
وأهلها يمنعوها ويقولوا
” مستحيل ترجعي لواحد أهله شتمونا وهزؤنا “
فمن الأول حل مشكلتك مع زوجتك أو أهلها بنفسك وبكل بهدوء
.
12- أصلح سبب الخلاف:
جميل إنك تصالح زوجتك وترجعوا لبعض أخيرا , بس طول ما السبب الرئيسي للخلاف موجود،فالصلح ده هايبقى مجرد مسكن وبعد فترة هايحصل خلاف ومشكلة تاني
شوف سبب الخلاف إيه , لو منك فاعمل على إصلاح نفسك علشان زوجتك تعيش مبسوطة معاك , ولو السبب منها فساعدها على إصلاح نفسها علشان تعيش مبسوط معاها
.
13- الطلاق أصل كل شر:
صحيح أن الطلاق مباح ولو ده لما يكون إستكمال الحياة بينكما مستحيلة
لكن الطلاق أسوأ شيء ممكن تعرض أطفالك ليه
بعد الطلاق لا قدر الله انت هاتكمل حياتك وزوجتك هاتكمل حياتها , لكن الأطفال هايعيشوا في جحيم طول عمرهم , وعلى مدار السنين إللي فاتت شوفت كم الأثار المدمرة على نفسية الأطفال إللي عانوا من إنفصال أبويهم
وانت أكيد لا تتمنى لأطفالك مصير مظلم زي ده .
يارب الناس تفهم كدة
ربنا يهدي النفوس
ويبعد عنا و عنكم شياطين الإنس قبل الجن الي عايزني يخربو بيوت الناس
متديش حد اي كان ودنك هيخرب بيتك واللهي اعتمد علي عقلك و قلبك و ضميرك
