حكومتنا الغاليه علينا طبعا لها انجازات واعمال محترمة محدش ينكرها مشروعات وطرق وكبارى وكهرباء فى كل المجالات اتجازات اتجازات
لكن حاله واحدة فقط سقطت فيها حكومتنا الرشيدة وهى فشلها فى ان تنال ثقة ومحبة الشعب المصرى مش كله طبعا الفقراء والمساكين ومن يطلق عليهم الطبقة المتوسطة اللى اتلغت من قاموس التوزيع السكانى للمصريين وحكومتنا قسمت وغيرت من هذا التوزيع السكانى الى قسمين لا ثالث لهما قسم فى العلالى فوق مش حاسين باى حاجة ولا لهم فى اى حاجة كل همهم جمع الفلوس وكنز الاموال تحت شعار اغرف هذه الايام وهات على غرار شعار فترة السادات اللى مغتناش فى عهدى ميفكرش يغتنى تانى والقسم الثانى بقية الشعب ويطلق عليه الشعب الصابر المضحى من اجل التنمية والاصلاح الاقتصادى ويصبح من اجل مصر طبقة المطحونين الصابرين وللاسف تحول جزء من هذه الطبقة الى المستوى الاول فجاءة وبلا مقدمات دون رقيب او حسيب ولا تطبيق لقانون من اين لك هذا ياهذا ايه اللى حولك من طبقة المطحونين الى طبقة البهوات العليا لاحد سال ولا حد عارف لكن اهل الطبقة الفقيرة هم اللى عارفين ومش هيتكلموا ولا هيتحدثوا ويحطوا حسرتهم فى نفسهم وخلاص وكفاية عليهم الصبر وقوة التحمل
الحكومة الرشيدة جت على الطبقة الثانية ياحرام وانتهجت نهج الغاء الدعم الغول اللى كان بينهش فى جسد الاقتصاد المصرى ماشى احنا موافقين الغوا الدعم بس بالراحة واحدة واحدة مش كله طعنات بالخناجر فى وقت واحد خلوا الضرب شوية طعنه وشويه لكمة او حتى شلوت تلغوا الدعم اللى اتربينا عليه حتى لو كان غلط والناس عايشة نصف مرتاحة به لسنوات طويلة جدا فى ظل حكومات متتاليه وبعدين ترفعوة وترموة فى البحر فى خمس ولا عشر سنوات فجاءة المواطن الغلبان يلاقى نفسة بلا دعم اقصد بلا غطاء يحميه ويحمى اولادة من قسوة الحياة ده كلام بالراحه بالتدريج ومده اطول
احنا مع الغاء الدعم لانه فعلا كان بنظام خلطبيط ولكن كل نظام اقتصادى وله مميزات وعيوب وكل اصلاح اقتصادى له قوانين وطرق ومسالك تخفف الحمل ولا تزيد الثقل وكان يجب ان تتبع حكومتنا الرشيدة نظام علاجى لسرطان الدعم غير حقن الكيماوى التى ارهقت الجسد المصرى الضعيف وغير نظام القروض وزيادة الديون او وضع الايد الحكومية فى جيوب الغلابه والمساكين
للاسف والمرار ان اصحاب الطبقة العليا اللى فى العلالى نزلوا ضرب هم كمان فى طبقة الغلابة والمساكين فرفعوا الدعم ورفعوا فيزيتا الكشف عند الاطباء ورفعوا الاسعار للسلع التى ينتجوها من مصانعهم بنسب كبيرة حتى تتضخم جيوبهم كمان وكمان والمصيبة الاعظم ان فيه ناس من طبقة الفقراء هاصوا وزاطوا فى الزيطة ورفعوا اسعاهم هم كمان امال الحلاق والمكوجى وسائق التوكتوك والجزمجى هيواجهوا غول الاسعار ازاى يعنى باختصار شديد الكل جه على الغلابة والمساكين ولا حول ولا قوة الا بالله الواحد القهار
نعم نحن وطنيين ونحب بلدنا ونضحى علشانها بدمنا بس لازم نعيش نصبر نتحمل بس يكون هناك بصيص من امل احنا مش شايفين ماشى يمكن نكون احنا اللى غلطانين وتكون حكومتنا الرشيده على حق واحنا مش فاهمين ولا شايفين وزى بعضه نعمل ودن من طين وودن من عجين وامرنا لله هو الرزاق الكريم وعشانا عليك يارب زى مكنا بنقولها زمان
مش كده ولا ايه
