والأستاذ يوسف عيد واللي بدأ حياته الفنية من أواخر الستينيات بمسرحيات علي مسرح الهواة ومسارح الدولة المختلفة وبأدوار صغيرة جداً في السينما قدر يكسب حب الناس وضحاكاتهم واللي كان بيعمله الاستاذ يوسف عيد شئ صعب جداً وخلينا نوضح ازاي، الفنان يوسف العيد كان بيطلع في أي فيلم مشهد او اتنين أو كحد أقصى خمس مشاهد يعني ظهوره في أي فيلم لا يتعدي الدقيقتين وهو كان مطلوب منه خلال الدقتين دول أنه يضحك الناس لأما المنتجين والمخرجين مش هيجبوه تاني فتلاقيه في فيلم زي الناظر مثلاً له مشهد مكنش بيتكلم خالص وقال كلمة واحدة بس لما علاء ولي الدين لما بيسأله قاعد بره ليه فرد عليه قاله “بتشمس” كلمة زي ديه لو اتقالت من اي حد غيره مكنتش هتكون مضحكة لكن تعابير وجهه قبل الكلمة ورد فعله بعدها هي اللي خلت اي كلمة بيقولها مضحكه.
الأستاذ يوسف عيد كان بيتعامل في أي عمل فني “باليومية” واللي مش عارف يعني ايه يومية هقولكم في أي عمل فني الابطال والأدوار التانية لهم عقود وبيقبضوا بنظام الدفعات طيب والممثلين الثانويين أمثال الاستاذ يوسف عيد بيتعاملوا باليومية بمعني جه واشتغل اليوم ياخد فلوسه وهو ماشي وده معناه أن أجره كان زهيد جداً وهو بيقول عن اخر فيلم عمله “عمر وسلوي” انه أثناء تصوير العمل اكتشف أن هو اللي شايل الفيلم وأن له دور بمساحة وان المنتج عامله بنظام اليومية يعني الأجر زهيد جداً بالنسبة للدور ولو كان يعرف حجم الدور كان هيطلب يتعمل له عقد زي مسلسل الرجل العناب وبمناسبة الرجل العناب فالفنان احمد فهمي بيقول عن مشاركة الاستاذ يوسف عيد معاهم انه كان ممكن كل واحد فيهم يقول ١٠٠ ايفيه ويدعوا ربنا أنه يلبس منهم خمسة يضحكوا لكن الاستاذ يوسف عيد واللي شاركهم فيلم الحرب العالمية الثالثة كان كلمة بيقولها بإيفيه ومفيش حاجة بتجلي منه.
المميز في الاستاذ يوسف عيد أن الكاميرا بتحب وشه وبتنقلك الطاقة اللي عنده وعشان تعرف فالراجل ده مجرد ظهوره علي الكاميرا بيكون عايز يعمل حاجات كتير اوي يعني يغني ويرمي ايفيهات ويمثل دراما ده حتي الاستعراض عمله في يا مهلبية يا هتقولي ليه كل ده هقولك لأنه عارف إنه هيظهر دقيقة أو دقيقه ونص كحد أقصى فلازم يطلع كل اللي عنده فبيكون عامل زي عربية السباق اللي مستنية إشارة الانطلاق عشان تبدع وتخرج كل حاجة عندها.
الفنان يوسف عيد بيحكي أن بعد وشه أتعرف كان مرة راكب تاكسي من البلاتوه ومروح علي بيته في شارع الجيش فسواق التاكسي مكنش مصدق أنه ساكن في منطقة بسيطة زي ديه وكان فاكره ساكن في التجمع ولا الشيخ زايد وقاله يا فنان انا هستناك لغاية متخلص زيارتك واوصلك البيت قاله يا أبني ما انا ساكن هنا ولو مش مصدقني تعالي اطلع شوف بيتي .. السواق كان زيه زي كل الناس فاكر أن اللي بيطلع على الشاشة عايش في قصور ميعرفش أن فنان كتير زي الأستاذ يوسف عيد اسمهم ملح الفن بيعيشوا يمتعونا ويموتوا دون أن نشعر بهم.
الفنان يوسف عيد اتوفي في ٢٢ سبتمبر سنة ٢٠١٤ بعد أن فقد بصره في أواخر أيامه.. لو كنت من محبيه يا ريت تقولنا افيه من أعماله أو دور فاكره له ومش قادر تنساه أنا عن نفسي دور حمدي كاتا في مسلسل الكبير اوي وخصوصاً الافيه بتاع اتشاهد بسرعة.
