المخرج محمد السباعي يكتب.. المسرح التجاري في البلالاه شوية صراحة

لو حد متابع كويس ما يحدث في فرق المسرح التجارى في اسكندرية
هيشوف حاجه مهمه جدا هتكلم الاول على مستوى الاخراج لاي عرض (الا من رحم ربي )مش كل العروض طبعا مستوى الاخراج تقريبا ما فيش.. هتلاقي المخرج هو المؤلف هو بطل العرض هو الكل في الكل من الاخر … والباقي بيخدم عليه
وده راجع لسبب مهم جدا ان هو ما عندوش استعداد يمسك ورق بتاع مؤلف اخر ويكون وجهه نظر فيها ابداع هو ما عندوش الحرفيه الأخطر من كده بقي ان في نصوص كتير جدا اتقدمت في النوع ده من المسرح ( مسروقه) ….. حصلت وانا مش هتكلم عن العروض دي دلوقتي…. وده راجع لانه ما تعلمش اصلا يعني ايه اخراج واخذ الموضوع فهلوه …
على مستوى التمثيل بقى تعال نتابع مع بعض كده ..اي ممثله بتعمل معلمه هتلاقي نفس الكاراكتر نفس اللبس نفس الكراكتر المتعارف عليه اللي شفناه زمان في المسلسلات والافلام مش هتلاقي اي جديد هات واحد قول له اعمل فتوه او صاحب قهوه او معلم هتلاقيه لابس القفطان وبيتكلم بنفس الطريقه والاسلوب التقليدي اللي كنا بنشوفه زمان في الافلام والمسلسلات……. ونماذج كتير من الشخصيات اللي بتتقدم جوه الدراما اللي هم يحاولوا يعملوها….. طب ده راجع لايه راجع لحاجه مهمه جدا . اولا لانهم فعلا مظلومين بيشتغلوا مع مخرجين ما عندهمش وعي ولا ثقافة التعامل مع سيكولوجية الممثل ولانهم مش يشوفوا كويس مش بيراقبوا الشارع كويس مافيش حتى كتاب صغير. بيقراؤه
ولذلك هم ما عندهمش المرجعيه اللي تخليهم يعرفوا يعني ايه تكوين شخصيه او الابداع في تكوين كاريكاتير مختلف يكون في جديد ولذلك هتلاقيهم كلهم شبه بعض الا من رحم ربي …. في قاعده مهمه جدا اي ممثل بيحب فعلا اللعبه لازم يعرفها انك لو اشتغلت مع مخرج شاطر وواعي وعنده ثقافه يضيف اليك من خبرته وثقافته لكن لما تشتغل مع مخرج هو اصلا مش مخرج وبيستغلك وبيستخدمك بطريقه غلط هياخد منك مش هيديك ولا يضيفلك شيء ووقتها موهبتك هتضعف جدا