كنت منهمكا فى متابعة ما يحدث فى الانتخابات الأمريكية من أحداث مثيرة حينما فاجأتنى الصغيرة كلمات آخر عنقود البنات (لحين أشعار آخر) بحوار لم أكن أتوقعه حيث سألتنى سؤالا كان يبدو بريئا قبل أن اكتشف أنه كان مجرد كمين وقعت فيه دون ان أدرى
– بابا بابا ممكن أسأل حضرتك سؤال؟
– طبعا طبعا يابنتى اسألى زى مانتى عايزة
– تقدر تقولى عدد ممثلى ولاية جورجيا فى المجمع الانتخابى كام واحد؟
– 16 واحد ولو عايزة كمان تعرفى عدد ممثلى كل ولاية فى المجمع الانتخابى كام ممكن اقولهوملك بالتفصيل.
– لا لا مفيش داعى بس لو ممكن يعنى أسأل حضرتك سؤال تانى؟
– طبعا يا كوكو تقدرى تسألى زى مانتى عايزة وهى دى حاجة عايزة استأذان
– حضرتك تعرف اللى فى سنة تالتة إعدادى بيدرسوا كام مادة؟
– إيه السؤال الغريب ده مالى انا ومال كام مادة بيدرسوها فى تالتة إعدادى وانتى علاقتك إيه بالكلام ده؟
– طيب هو حضرتك تعرف أنا فى سنة كام؟
– احم احم آه طبعا وهى دى عايزة كلام طبعا فى تالتة إعدادى أكيد!
– هههههههه لا يا بابا عليك واحد أنا فى تانية إعدادى!
– وهى تفرق إيه يعنى تانية من تالتة هو انتوا فاكرين نفسكم بتتعلموا حاجة فين أيام ما كان التعليم تعليم بجد.. انا بقى لو أحكيلك…
– ماتغيرش الموضوع يا بابا علشان لسه عندى كام سؤال تانيين.
– وبعدين بقى طب مش ممكن تأجلى أسئلتك دى لغاية لما تخلص الانتخابات الأمريكية وأطمن على النتيجة؟
– ما هو السؤال الجاى خاص برضه بالانتخابات الأمريكية!
– ما هو اللى فات كان كده وتضح انه كمين.. عموما اسألى عايزة تعرفى إيه كمان؟
– هو ليه حضرتك مهتم أوى كده باللى بيحصل فى أمريكا بالتفصيل؟
– بصراحة كده لأنى مهتم بأمريكا
– طب وبتهتم بماما برضه؟
– طبعا مهتم جدا وهو ده سؤال برضه؟
– طب ليه ساعات باحس انك ماتعرفش تفاصيل عن ماما زى مابتعرف تفاصيل كل حاجة عن أمريكا؟! يابابا أنا بيتهيألى لو حضرتك عملت دكتوراة عن الولايات المتحدة الأمريكية حاتعملها فى شهر وأنا واثقة أنك حاتنجح فيها بامتياز مع مرتبة الشرف الأولى لكن لو حاولت تعمل ولو بكالوريوس او مثلا ماجيستير عن ماما أشك انك تخلصه لو حتى فى عشرين ولا خمسة وعشرين سنة اللى عاشرت فيهم ماما!
– يابنتى هو انتى حد مسلطك عليا؟ طب إيه رأيك بقى انى ممكن أعمل دكتوراة واتنين وتلاتة كمان عن ماما مش بس بكالوريوس ولا ماجيستير؟
– يابابا الاهتمام مابيطلبش والموضوع مش كلام وبس.. ومعلش يعنى اتحدى لو حضرتك تعرف معلومات تفصيلية عن ماما ولا عنى ولا عن اخواتى الأربعة زى ما بتعرف معلومات عن الخمسين ولاية بتوع أمريكا.. ده حضرتك من أول ما بترجع من الشغل وقبل حتى ما تغير هدومك بتفتح التليفزيون عشان تعرف خناقة ترامب وبايدن وصلت لأيه مع انك مثلا عمرك ما حاولت تعرف هل فيه أى مشاكل بينى وبين أى زميلة مثلا فى المدرسة ولا حتى بينى وبين اخواتى أو حتى إيه المناهج اللى بندرسها فى المدرسة وهل باستفيد منها ولا لأ؟
– بالعكس بقى أنا يمكن مش بيبان عليا انى مهتم لكن ايش قولك بقى انى عارف كل التفاصيل عنك وعن مدرستك ودراستك وكله كله؟
– طب ادينى أمارة واحدة.
– خدى عندك إمارة.. أنا رحت من كام يوم سألت عليكى فى المدرسة فى فصلك اللى هو تانية تالت ومالقتكيش موجودة.
– طبعا عمرك ما كنت حتلاقينى فى تانية تالت ولا حتى تانية رابع!
– ليه بقى انتى غيرتى الفصل؟
– لا يا بابا لانى لسه فى أولى إعدادى مش تانية إعدادى أصلا!
