– مساء الخير يا دكتور
– وعليكم السلام ورحمة الله وبركاته
– غريبة جدا أقول لك مساء الخير تقولى لى السلام عليكم ورحمة الله..من الذى علمك أن هذه أفضل من تلك؟
– الغريب هو رد فعل حضرتك فكما ان لك الحرية فى اختيار التحية فأنا حر فى طريقة الرد..ومع ذلك لو تضايقك السلام عليكم أوك مفيش مشكلة..مساء النور يافندم.
– أنت تسخر منى إذن؟!
– حاشا لله ألا تعلم أن الدين نهانا عن ان نسخر بعضنا من بعض؟
– عايز تفهمنى أنك بتفهم فى الدين أكتر منى؟
– لا خالص يافندم لا سمح الله.
– الله الله لماذا تحشر الله فى كل كلامك؟
– استغفر الله العظيم.
– تانى حاتقولى الله، ثم إيه اللى كنت بتقرا فيه ده ؟
– ده القرآن الكريم كتاب ربنا سبحانه وتعالى.
– معلش يعنى كتاب ربنا بيعمل إيه فى الصيدلية؟
– لما بيكون مفيش زباين بقرالى شوية قرآن ينفعونا فى آخرتنا.
– غريبة شاب فى مقتبل حياته يبقى مشغول بالآخرة ليه من دلوقتى؟
– يا استاذ محدش عارف حايموت امتى ربنا يحسن ختامنا.
– طيب ليه ماتقراش القرآن فى بيتكم و ليه لما دخلت مالقتكش بتقرا فى قاموس طبى أو مرجع عن الدواء مثلا ؟
– أولا حضرتك أنا والحمدلله لم اكتف ببكالوريوس الصيدلة لكن عملت ماجستير عن التصميم والتوليف والتقييم البيولوجى لبعض المشتقات الجديدة كعوامل محتملة مضادة للسرطان.
– ازاى يعنى وانت وقت فراغك مقضيه بتقرا فى المصحف؟
– هو حضرتك عايش معايا اليوم كله عشان تعرف انا باقضى وقتى ازاى؟الموضوع تنظيم وقت ومش معنى إن حضرتك شوفتنى وانا بقرأ القرآن أنى مش مهتم بتخصصى كصيدلى.
ثم إن علوم القرآن الكريم من وجهة نظرى هى مصدر لكل العلوم اللى بندرسها سواء فى المدارس ولا الجامعات.
– إيه الكلام الغريب ده يادكتور..القرآن كتاب مقدس نزل لتنظيم حياة الناس فى وقت معين.
– لا يا استاذ كلام ربنا صالح لكل زمان ومكان.للدنيا والآخرة.
– ده كلام المتطرفين ولا يصح انه يكون كلام العلماء اللى بتحاول تقنعنى إنك واحد منهم.
– يا استاذ انا مش عالم ومش بحاول اقنعك ولا حاجة انت سألتنى وأنا بجاوبك..ممكن بقى تدينى الروشتة علشان اصرفهالك.
– هو كلامى مش عاجبك ولا إيه؟
– يا استاذ ادينى الروشتة علشان أجيبلك دواك وربنا يجعله سبب ويشفيك.
– قصدك إيه انت شايفنى مجنون ولا إيه؟
– يا استاذ انا مش شايفك ولا حاجة.
– تقصد انك بتحتقرنى؟هو ده اللى اتعلمته من المصحف؟
– لا حول ولا قوة إلا بالله.
– أيوه بان على حقيقتك يا متطرف !
– شكرا على ذوقك، بس ممكن أعرف حضرتك بتشتغل إيه بالظبط؟
– أنا مفكر كبير ومستنير والحق عليا انى ضيعت وقتى معاك وبلاها دوا من عندك.
– زى ما تحب وربنا يشفيك.
– تانى؟عموما واضح انه مفيش فايدة فيك..لا قال ومعاك ماجستير ومش بعيد تكون بتفكر تعمل دكتوراة كمان.
– بصراحة مكنتش ناوى لكن دلوقتى بافكر اعمل دكتوراة لعوامل التشخيص بالأشعة السينية مع التطبيق على العقول المريضة والقلوب المصدية!.
