مين قالك تعرف “جلجامش”
وتعيش مستأنس بين الناس
وتموت كالرمز على الهامش
ياما عشت كما الوحش البرى
ومحدش كان يقدر يغرى ..
نظرة عينك
بجمال فتان ومهلوش آخر
الحب فى قلبك متاخر
والحرف بينزل من قلمك .. مُر وساخر
إيه اللي حصلك جوايا ما كُنت صديقى
ياصديقى
مين اللى سمحلك تعادينى .. وتبقى عديقى
أنا داخل نفسى وبتمزق
وبقيت مخلوق خارج نفسى
وداخل روحى ومش سسيولوجى
وميتا فيزيقى
” انكيدو”
عود تانى لنفسك
لا هتمسك قرن التور تانى
ولا حتى ها تقدر تنسانى
البحر وراك .. وعدوك واقف قدامك
و”خومبابا ” يموت على أقدامك
كان نفسى تعيش .. زى النخل بعودك صامد
وتموت واقف
لكن للأسف المتراكم
من ساعة ما بقيت مُستأنس
والقلب الناعم بيك يأنس
أصبحت يا صاحبى على الهامش
عايش مش عايش مُتعايش
