منيش مشغول.
وقلبى فيه حتت ساكتة وحتت بتقول
تاريخى كله عن فكرة بتتغير معاها فصول
وانا ثابت ……….قصايدى كلها تابت
معادش الحب ينفع ذنب
ولا عاد قلبي حتى يطول
خلاص الحب أصبح مرتبط رسمى بطبق الفول
معادش شعور يحركنى…ولا يدركنى أى زمان
لغاية الكلمة ما انتحرت…وانا بطلت عيشة كمان
خلايا الحب فى مكانها…ولا بتكبر
ولا بيصيبها شوق وحنان
سؤال لازم…
اذا حبيت وراح الحب هل ممكن
تحب جديد. ؟
وهل ممكن يحس القلب بالتجديد
وهل ممكن تعيش الحالة بظروفها…
قصيدة تنكتب نوبتين بنفس المعنى وحروفها
وهوه الحب لما يقل…بعدين هل يفور ويفيض ؟
وهل كل الشعور واحد
بما معنى انى لو حبيت وحبيت تانى هو الطعم نفس الطعم
نفس الريحة والمقادير
ولون الحب هل يبهت مع التغيير
ولغة الحب . ألفاظه….وهمساته ولمساته وأوجاعه وأهاته…ودلعه وكل حواراته.
وطوله وعرضه وصفاته..طرق حلمه…..
مطباته….مسافاته….
وهل يعنى السهر واحد…ونفس الليل
ملامحك هى هياها…… وهل فعلا بتنساها..وصفحة بتنتهى وتروح بأخطائها وبلواها وبفجورها وتقواها…وهل لو يوم لقيت إحساس يكون انبعث أشقاها
جميع الأسئلة متاهات
وقال البعض…بعد التجربة الأولي
بتتحول لواحد تانى والأولانى فعلا مات
وعلما العشق قالوا جينات
وعلما الشعر قالوا القافية والأبيات
بتوع القلب قالوا الرك ع النيات
وانا لدلوقتى مش عارف احب ازاى
وقلبي أسير..قصيدة لقيتها فى التحرير
وقول عصافير…….خدوه بالغصب بغبغانات
مفيش ف القلب عمر كتير
خلاص مبقيتش قادر اغير….
أنا استنفدت كل الحب كل دفاتر التوفير
انااااا تعبان ..
وليه الحلم ماببكلمش..ليه اصحى ف عز الفرح الاقى حياتى ف مكانها
والاقي الموت.. بقي ع الرف فى الدكان
