وانا قاعدة عمالة افكر .. عايزه انزل اروح ازور صاحبتى .. وقلت لخيالى اتهد شوية وسيبنى فى حالى .. حرام عليك يا خيالى … عمال تشطح وتفرطح براحتك فى نافوخى الغلبان وانا ساكته لك واقول معلش يا انا استحملي اهو مننا وعلينا .. لقيت خيالى زعل واخد جنب وقاعد بعيد .. وقمت فتحت الدولاب وعماله اختار البس الطقم ده .. ولا الطقم ده هيكون احلى فيا .. لقيت الناقدة اللى جوايا خرجت .. وبحلقت فيا واخدت الطقم والقت به على الارض وقالت : البسى اى حاجه .. ولسه هاتناقش معاها .. لقيت السينارسيت اللى جوايا خرجت وهات يازعيق وخناق مع الناقدة .. اه نسيت اقول لكم .. ماهو انا لابسنى اكثر من شخصية .. الناقدة المملة اللى مايجعبهاش اى حاجه … والسيناريت الفرفوشه النعنوشة المتفائلة .. المهم مش عايزه اطول عليكم .. قولوا لي طولى عادى .. لقيت السينارسيت بتقولي اوعى تسمعى كلام الناقدة ام دم تقيل : ادخلى اغسلى وشك.. اذ والقى الناقدة تقاطع كلام السينارسيت وتتريق وتقول
” الحلو حلو لو قام من النوم .. والوحش وحش لو غسل وشه كل يوم ” ..تسكت السينارسيت بقي … لأ ردت عليها وقالت لها يا حتة سيناريست المثل بيقول ” زوق البوصة تبقى عروسة ” … انا لقيتنى اتخضيت .. ايه ده يا سيناريست انتى شيفانى بوصة … ولسه هأعاتبها لقيتها بتشجعنى ..
وتقول لي يلا البسى وقبل ماتروحي لصاحبتك .. عدى على شركات الانتاج حاولى تسوقى شغلك .. ده ” الرزق يحب الخفية ” … قوم ردت عليها الست الناقدة وقالت ” اجرى يا ابن ادم جرى الوحوش غير رزقك لم تحوش ” … وكمان ” اللى سبق اكل النبق ” .. ردت عليها السينارسيت بذكاء وقالت وماله .. تلحق النبق اللى بعده … المهم … انا قلت لازم امشى من البيت شوية واريح دماغى ..
ولسه بأفتح باب الشقة لقيت السينارسيت والناقدة لابسين وجايين معايا .. حاولت اهرب منهم … ودول راسهم والف سيف ييجوا معايا …
والسيناريست ماسكة فى ايديها اعمالى اللى بأكتب فيها كوميدي وتراجيدى و ووو .. والناقدة تقول لى شايفه السينارسيت اللى مخها طاقق قال ماسكة المسلسلات معاها وهى جايه معاكي … هتكسفك ماتعرفش ان المسلسلات دى كلها ” نص كم ” ..
ولسه هأرد عليها … ردت قبلى السينارسيت وقالت …….
اشوفكم على خير بكره .. مع باقى الحكاية
حنان غانم
