مين علِّمني الباء والنُّون؟! . مين علِّمني حساب وفنون؟!
مين علِّمني أمسك قلمي.. وارفع صوتي أحيِّي ف علمي
مين علِّمني حُب بلادي…….ف ابتدائية يا ناس واعدادي
ونصايحه ف الفصل فاكرها ….مخلص زي الأب حنون
…
مين علِّمني الباء والنُّون؟! . مين علِّمني حساب وفنون؟!
مين علِّمني اكتب ع السَّطر…وارسم قطة وشجرة وقطر
مين كان يشرح لي ويفسَّر …ويوضح في سؤال متعسَّر
كان واقف جنبي يشجعني…. لجل ما أحقق ذاتي واكون
….
مين كان طولة البال والصَّبر …بالضحكاية لخاطر جبْر
مين علِّمني أرسم أحلامى؟!….واذوَّق بالنَّحو كلامي؟!
ويراجع ويعيد ويزيد……………لجل مانفهم كل مفيد
وتاريخنا وعلوم جغرافية……..وموسيقى وقد افترنون
…
مين كان لينا بحكمة يعلم ؟!……. ويحذَّر من جهل يألم
كان ف الحوش معمل أو حصة.. بيعلمني أمانة ف قصة
يسأل عنِّي ف يوم لو غايب..ويقول انتوا يا أغلى حبايب
لمَّا باشوفكوا كدا ناجحين ……….كل تعب أنساه ويهون
…
مين علمني الصُّوت والضُّوء.. .وإنِّي سماحة القلب وضوء
كوكب أرض الطُّول والعرض .. و إنِّي صلاة الإنسان فرض
وكان ينده في طابور يناديني…. و شهادة تقدير يدِّيني
مين ربَّى الأجيال والقدوة….ومين فتَّح بالعلم عيون؟!
…..
مين علِّمنى مضارع ماضي؟! .وازاى أبقى محامي وقاضي
ولاَّ مذيع يظهر ع الشَّاشة…. .بالضِّحكة الحلوة البشَّاشة
كنت طبيب ونجوم دبُّورة.. مين ينسى وقفة سبُّورة ؟!
أستاذي بستان وجناين………عِطر الورد ف كل غصون
…
مين علِّمنى تاريخ وحساب؟! وإنِّى الشَّر مالوش أنساب
وينمِّيلي يا ناس موهبتى ..وقالِّى العلم يزيد من هيبتي
وادَّانى النِّجمة ف كراستي..ويراجع تمْرين ف دراستي
ويعلِّم أخلاق ومبادئ…………. وسْلُوكنا وقد أفترنون
…
مين علِّمني الذُّوق وأناقة …..وإنِّي كلامي يكون بلباقة
مين علِّمني حُب الخير ؟!……وارسم جامع جنب الدِّير
واعشق مصر الغالية أصونها ..وازرع ورد الحُب غصونها
و إنِّي الأمَّة الجاهلة ف غمَّة..و إنِّي الجهل ضلام وسكون
….
مين علِّمني الباء والنُّون؟! …مين علِّمني حساب وفنون؟!
أستاذي الفاضل متشكَّر…………..ولفضلك دايمًا متذكِّر
بنقدِّم عرفان وتحيَّة…………..ندعيلك من خالص نيَّة
لجمايلك ازاي هنوفِّي؟!…….طول عمري انا ليك ممنون
مين علِّمني الباء والنُّون؟! …مين علِّمني حساب وفنون؟!
…
