جريدة الاخبارية سياسية::شاملة::مستقلة
مقالات مشابهة
هنتكلم انهارده عن أشهر مرض بيتشخص غلط ف مصر و اكتر مرض مظلوم هو مرض النقرس
مرض النقرس بيحصل نتيجه ارتفاع املاح النقرس بالدم (يوريك اسيد uric acid) و ترسب هذا الملح ف المفاصل و الكلي و الانسجه المختلفه
مرض النقرس بيتسمي مرض الملوك لانه مشهور أن أكل كميات كبيرة من اللحوم (البروتين عموما) بيرفع نسبه ملح النقرس ف الدم
لكن ف الحقيقة ثبت علميا ان مش لازم يحصل للملوك ولا حاجه و مش مرتبط اوي كده بالاكل لكن ف عيوب في وظيفة الكلي هي الي بتخليها تحتفظ بملح النقرس ف الدم بدل ما تنزله في البول
كمان ارتفاع املاح النقرس بيحصل في مرضي امراض الدم و الاورام الي بياخدوا علاجات كيماويه بسبب تكسير خلايا السرطان ليؤدي لإنتاج كميات كبيره من اليوريك اسيد
املاح النقرس بتترسب غالبا في مفصل واحد و غالبا المفصل ده بيبقي صباع الرجل الكبير …..فبيسبب الام شديده و التهاب بالمفصل ده و احمرار و سخونة
ممكن يتكرر الاصابه بالتهاب المفصل من النقرس مرات متعدده بالذات مع اكل كميات لحوم كبيرة أو استخدام أدوية بترفع نسبه النقرس ف الدم زي بعض علاجات الضغط
و ممكن يعمل حصوات بالكلية و املاح بالبول
تحليل النقرس متوافر في كل المعامل الحمد لله لتأكيد التشخيص و ممكن عمل اشعه اكس راي او سونار
لكن مش مفروض نبدا العلاج الا بعد عمل تحاليل
و بخاصة أن آلام المفاصل ليها اسباب كتير جدا …متاخدش علاج للاملاح الا بعد التحاليل و استشارة طبيب مختص
يعني مش كل حد مفاصله بتوجعه ياخد زيلوريك و الله
العلاج المشهور جدا للنقرس هو زيلوريك أو نويوريك ….لكن في مجموعه احدث من ادويه النقرس ظهرت حديثا ليها اثار جانبيه أقل بكثير
