يا مانع الفرخة
واللحمة والبطة
كل البطون صارخة
طعم الحياة شطة
الجوع بيكويها
والدمع في عنيها
طب مين يواسيها
ويحل دي الورطة
يا سارق السكر
تجمع فلوس أكتر
خبرني لو تقدر
بالحل والخطة
لو جالك القابض
يقبض هنا روحك
وما عدش فيك نابض
وبإيه يفيد نوحك
ما أنت البعيد كافر
جاهل وبتعافر
في الظلم بتسافر
والعدل مجروحك
تسرق وتنصحني
يبقى الرضا حالي
تضحك وتدبحني
وتقول وانا مالي
والكلمة مفهومة
والدمعة مكتومة
واليد محرومة
ورضيت بأهوالي
بسمع حكاويكم
واضحك وانا ساكت
الكدبة في عنيكم
ولا عمرها غابت
والأرض من خوفها
خاصمت هنا حروفها
لو تيجي وتشوفها
طفلة بشعور شابت
أنا بصنع البسمة
على وش أزهاري
وبداري كام رسمة
لصراع في أشعاري
يصرخ وبيعاتب
اسمح لي يا كاتب
اطلع واقول غاضب
من خوفي وحصاري
أنا ساكن الجنة
مش لاقي من خيرها
الحق بقى منة
منها ومن غيرها
واللقمة ممنوعة
والأرض مخدوعة
والكدبة مسموعة
تقصف جناح طيرها
رب العباد واهب
للدنيا من فضله
لكن الطمع ناهب
ناكر هنا عدله
والليل بيحكمنا
يرسم هنا غيومنا
يصنع لنا همومنا
ولا حد بيجادله
ما تقولوا يا فلاسفة
ليه الفقير عايش
لو توصفوا وصفة
للسائل الطايش
يسكت ما يتكلم
وفي لحظة يتعلم
يصبر ما يتألم
على كلمة الفاحش
والجوع يكون عادة
والصمت يرضينا
والطبل بزيادة
والنوم مكفينا
ولا نطلب اللحمة
ولا حتة من فرخة
ولا نطلب اللقمة
لو في البطون صرخة
بكرة الحساب يجمع
ولا حد بات ينفع
لما العذاب يوجع
تاكل من الطبخة
يا مانع اللحمة
يا حابس الفرخة
لو كنت يوم صادق
اسمع هنا الصرخة
