واحد اتنين سى السيد راح فين؟
إيه المزاج العالى ده يا أمينة وبتعدى فى إيه ع الصبح.. تكونيش بتعدى فى الطائرات المسيرة اللى ضربتها إيران على إسرائيل؟!
ولا مسيرة ولا مخيرة يا خويا ده كلها طيارات فشنك لكن أنا بأعد الصواريخ إللى جابها الزمالك فى الأهلى!
والله وطلعلك حس يا أمينة.. يا ولية عيب عليكى تبقى عديتى الستين ولسه بتهتمى بالتفاهات دى!
أيوه أيوه ما هو انتوا كده لما تتغلبوا.. لكن لو كسبتوا كان زمانك دلوقتى بتضرب نار يا سى السيد!
يا أمينة عيب عليكى هو أصلاً عاد فيه كورة فى مصر؟
يا سبحان الله.. ده انت لسه لغاية يومين عدوا يا راجل كنت كل ما أسألك مالك يا خويا تقولى أصلى معدتى «قفشة» عليا عشان يعنى تفكرنى بالقاضية ممكن وتنكد عليا وكده.. تقوم فى يوم وليلة بقيت ملكش فى الكورة وشايف إنى مأفورة؟
مش القصد يا أمينة بس متأخذنيش يعنى العالم على وشك حرب عالمية.. وبعدين ماتستعجليش الأهلى أكيد هيرد ومش هيسكت!
بس يا رب ميكونش زى الرد الإيرانى على إسرائيل يا سى السيد إللى طلع أونطة، يا ريت إيران تعرف تدى إسرائيل سيف ولا سيفين من بتوع سيف الجزيرى!
تصدقى إن الفيلسوف الكندى آلان دونو عنده حق؟
ويطلع مين الكندى نيون ده يكونش أبو سيلين نيون المطربة الكندية اللى غنت غنيوة تيتانك؟
ههههههههه الله يحظك يا أمينة وإيه الثقافة دى كلها.. أولا هو اسمه آلان دونو وهى اسمها سيلين ديون مش نيون!
بمناسبة الديون هات الله يكرمك التلاتلاف جنيه بتوع الجمعية لحسن جارتنا اللى تحت أم محمد طالبتنى بيها مرتين تلاتة لغاية دلوقتى واضطريت استلفهم من أم عصام.
يا ولية اكلمك عن الفيلسوف آلان دونو تكلمينى عن ديون وجمعية وأم عادل وأم سعاد،، ولما أسيبك وأروح عند جليلة وزبيدة تزعلى وتقولى مش بيشركنى معاه فى همومه؟
انتوا أبطال ومايصحش تنهاروا بالشكل ده من حتة ماتش.. المهم ماله سى آلان دونو ده؟
ده فيلسوف كندى مألف نظرية اسمها نظرية التفاهة.
ودى غير نظرية التفاحة بتاعة سى نيوتن يا سى السيد؟
أيوه يا أمينة والحمدلله إن آلان نونو ميعرفكيش وإلا كان عمل النظرية كلها عليكى!
ليه يعنى هو قايل إيه يا سى السيد فى المظهرية دى؟!
ههههه نظرية إن لما القيم والمبادئ الراقية تغيب بيظهر على السطح الفساد المبرمج ذوقاً وقيماً وإن كل ما تعمق الإنسان فى الإسفاف ازداد جماهيرية وشهرة!
بمناسبة الشهرة ما تيجى يا خويا نضربلنا فيديوهين تلاتة أنا وانت وننزلهم ع الفيس ونكسر الدنيا ونلملنا قرشين.
ما هو دونو قال إن مواقع التواصل نجحت فى ترميز التافهين حيث صار بإمكان أى جميلة بلهاء أو وسيم فارغ أن يفرضوا أنفسهم على المشاهدين عبر منصات هلامية.
ألا يعنى إيه هلامية دى يا سى السيد؟
يعنى عرفتى كل الكلام ماعدا دى؟ وانا اللى هارى نفسى شرح.. طب لمى هدومك وعلى أمك يا أمينة!
أحب على يدك بلاش يا سى السيد لحسن أمى أهلاوية
لكى حق تفرحى ما هى أصلى الحلوة خوخة جت بعد دوخة.. ده انتوا مكسبتوناش فى الدور الأول ييجى من 21 سنة يا أمينة وكمان العيال بتوعكم واقفين ورا الجون يخبوا الكور علشان يضيعوا الوقت!
طب طالما معندكش روح رياضية أنا رايحة عند امى بس قبل ما امشى عندى كلمتين عايزاك توصلهم لصاحبك سى نونو بتاع التفاهة ده.. قوله ملقوش فى الزمالك عيب قالوا مكسبوناش من ابصر كام مليون دقيقة وعيالهم بتخبى الكور!
