كتبت سامية الفقى
إحنا بنشوف اليومين دول ظاهرة منتشرة اوووي ..
إن الواحدة تبقى متجوزة ومعاها عيال وكمان متجوزة عن حب وتلاقيها بتخون جوزها مع واحد ضحك عليها بكلمتين ..
نركز في الكلمتين دول كويس لأن دى مصيبة كبيرة وطبعًا السبب النت ومواقع التواصل الزفت اللي الناس بتستخدمها غلط أصلًا ..
( إبن عمك – إبن خالك – إبن الجن الأزرق – زميل دراسة – زميل عمل – جارنا من زمان )
بعتلك ..
مساء الخير / صباح الخير
إزيك عاملة إيه ؟
مُش باينة ليه ؟
طمنيني عليكي؟
وحشتيني ؟
هى بتبدأ كدا وتنتهى بموت ودمار وخراب بيوت ، فتحتى بابك للشيطان و هيخرب بيتك بعدها ..
مالك حزينه ليه ؟
حاسس من كلامك إنك متضايقة ؟
طب إحكيلى، فضفضيلى !
جوزك ضايقك ؟
أنت لو مراتى مستحيل أسيبك لحظة ؟
ورا إبتسامتك الحلوة دى حاسس إن فيه حزن عميق !
لأ حساس يا واد يا إبن ……
حد قالك إن عينيك حلوة !
هتعملى إيه النهارده ؟
أكلتى ؟
فطرتى ؟
يا حنين يا ابو قلب كبير يا إبن ……
صفحتك على الفيس حزينة قوى وكومنتاتك فيها شرود !
إتغديتى ؟
هيجيلى سكتة قلبية من السهوكة !!!
طبعًا انتي زي الهبلة وتلاقى قلبك خرج من جسمك
إيه دا حاسس بيا ، وتلاقى نفسك بتفصفضى وتشكى مع إن هو ماله أصلًا ؟
و دى هى الطريقة اللي بيجيبك منها ..
هوب إتعلقتى بيه وبقيتوا اصحاب ميعديش يوم بالكتير غير لما تتكلمى معاه و بتحكى معاه على إنه صديق مع إنك من جواكى بتحبيه وعاوزاه يتجوزك و هو يقولك أنا عايز أتجوزك بردو بس لولا إنك ست متجوزة ، عارفة أول ما تطلقى هتجوزك على طول و يجيبك سكة من هنا !
ولو اتطلقتي تلاقيه بيقولك لأ طبعًا لو اتجوزتك هتعملي مع غيري اللي كنتي بتعمليه معايا !
وصل للي هو عاوزه من الأول ، ما هو مفيش أسهل منك متجوزة و هتخافى تتفضحى فـ عادى بقى ( ما تسيبى الواد يلعب يا بت ) بيحبنى بقى !!!
و تحصلى على لقب ست متزوجة و ( زانية – خاينة – شمال ) .. وخاينة فى كل الأديان و الأعراف و التقاليد و العادات و المجتمعات ، لا تقولى بقى مشاعرى ولحظة شيطان و لا غلطة ، انتي اللي فتحتى للشيطان بابك على مصراعيه !
أول ما تلاقى واحد بعتلك كدا من غير حوارات ونقاشات بلوك على طول واللي يزعل مع السلامة ويخبط راسه في الحيط حتى لو قريبك دي أصول ومبادئ ، أحسن ما تندمى فى الآخر وتبكي بدل الدموع دم ..
يا بنت الأصول حافظى على بيتك مهما كانت حالتك .. يا بنت الأصول متدخليش أى راجل حياتك ، لاقيتى راجل بصلك بصه إعجاب عينك متترفعش ليه تانى ، انتي على ذمة راجل خليكى فى حلالك ، فى حضن جوزك إعملى اللي انتي عاوزاه ، مش لما نقولك إعملى كدا تقولي بتكسف .. طيب مبتكسفيش ليه من الرجالة الغريبة ولا على رأي المثل البلد اللي محدش يعرفك فيها، شلح واجري فيها !!!
و طبيعي الشيطان لازم يكرهكك فى جوزك وتبدأي تعملى طلباته بالعافية و انتي مش طايقاه وعقلك بيقارن بين الكلام الحلو و الإهتمام بتاع اللي خلاكى شمال وبين جوزك و انتي شايفاه نايم بيشخر من التعب فى الشغل ، إنما التانى قاعد صايع وهو متعود على كدا مع ستات متجوزة كتير عشان صايع و عارف إنها لقمة طرية و سهلة ولا أهلى و شبكة و مهر و مسئولية و تكتيفة و ربطة لأ و كمان هتبقى خايفة تتفضح ..
بيوت كتير خربت بسبب العلاقات دي جوزك اللي طالع عينه في شغله دا عشانك انتي وعيالكم مش حد تاني ..
قال -سبحانه وتعالى- : { الزَّانِيَةُ وَالزَّانِي فَاجْلِدُوا كُلَّ وَاحِدٍ مِنْهُمَا مِائَةَ جَلْدَةٍ ۖ وَلَا تَأْخُذْكُمْ بِهِمَا رَأْفَةٌ فِي دِينِ اللَّهِ إِنْ كُنْتُمْ تُؤْمِنُونَ بِاللَّهِ وَالْيَوْمِ الْآخِرِ ۖ وَلْيَشْهَدْ عَذَابَهُمَا طَائِفَةٌ مِنَ الْمُؤْمِنِينَ }
ربنا قال الزانية قبل الزاني لان اكتر أهل الزنا من النساء ، وخليكي فاكرة كلامي كويس ان البنت أو الست هى اللي بتفتح بابها مش الراجل ، لأن هو لو وقف على شعر حواجبه مش هيعرف يفتح بابها لو هى مش عايزة تفتحه .
