مش هازعل تاني زي زمان
مش هاحرق دمي عالفاضي وعالمليان
مابقاش فارق معايا مين استني ومين
اختار يفارقنا، راح افتحله الباب واقوله ياك في باعدنا راح تتهني.
أيوة انا اتغيرت،،،
مابقتش اتصدم أو اتفاجئ خلاص بقا كل شئ حدوثه جايز ووارد.
أيوة انا اتغيرت،،،
مبقاش عندي انبهار من تغيير البشر أو الأقدار حتي لو كانت غريبة وتستحق الاندهاش والاستغراب.
أيوة انا اتغيرت،،،
مبقتش استني حاجة من حد، ولا بقا عندي العشم في حد ،وعرفتها من زمان إن بلاش تتعشم في انسان وخلي عشمك بس في الرحمن.
أيوة انا اتغيرت..
اصلي كتير انجرحت، وبسبب طيبة قلبي ياما اندبحت، والحزن علم في قلبي علامة تخلي مشاعري بارده فاتره ويمكن جبانه من أي علاقة ممكن يكون آخرها كسر خاطر او جرح أو مهانه.
أيوة انا اتغيرت،،،
لدرجة اني حاسه اني بقيت انسانه تانية جديدة اوي عليا بس
بصراحه عجباني
بقيت كتير بكبر عقلي و اقول وانا مالي خليني بعيد وفي حالي
ايوة انا اتغييرت،،،
وعلي اد ما التغيير ده كان وراه وجع وجراح وألم
بس بصراحة بشكر المواقف والناس
اللي بسببهم
اتغييرت
