زعلك ما لوش أسباب
أمرك بجد عجيب
زعلانة ليه إن أنا
أيام بكون حاضر
وعنك ساعات بغيب؟
عمليني بشر
أنا مش إلاه
أنا حد دهساه
دهاليز الحياة
بضحك ساعات
ببكي ساعات
بغرق كتير
في أبسط حاجات
أيوه ابتسامتي
نورها شُعاع في عيون الضرير
رافض هزيمتي
رافض عيونك تشوفني ذليل
مش شرط العليل
تظهر في جسمه مكان العلة
يمكن أكون في عيونك كبير
لكني في عيون الحياة.. قله
أنا الغطا ليكِ
وغطا لمائة عِله
ووقت الشمس مطلوب
أكونلك هوا وضله
جيبي نجم غفل في مرة السما
وصلّى معانا الضهر
جيبي شمس دفتنا ليل الشتا
لمدة ثانية طول الدهر
أنا عاشق هواكِ إنّما
مِشاركك في قلبي القهر
أنا شايل هواكِ في إيدي
وشايل آنين ع الضهر
أنا وجعي سلاح محبوس
ينطلق.. يطرح جيوش شهداء
أنا ألف نام ع الورق
مستني حرف الباء
أنا نص أب في زمن
الأب فيه مُستاء
جسمي شوال من جلد
مقفول على أشلاء
كُلّي هموم وعارف
همومي مش إبتلاء
لأني مجرد بشر
مش نبي م الأنبياء
فا متزعليش
لمَّا أغيب عن عيونِك حبَّة
ولحظة رجوعي اعرفي
إنّي هربان من عيون القهر
وجاي جواكِ أستخبا
احضني .. طبطبي
متزديش القهر قهر
الفرحة في بعادِك وهم
والقرب منك لحظة واحدة
بفرح شهر
توبي عن صوت النكد
والبسي توبك
لفيت بلاد العشق
ما لقيتش غير توبك
خليلي الدُنيا جنة
أنا ضامن جنتك
ناوي يوم الحساب
أشتري ذنوبك
