سامى حربى يكتب.. كلمتين وبس

بعد فضائح بعض رجال الاعمال بدون ذكر اسماء لانها لا تهمنى ولا تعنينى فضيحتهم فى شئ سمعنا نغمات شاذه من بعضهم ممن اشارت اليهم تهم البلطجة والفساد والثراء بغير حساب وبدون مقدمات او اى خد وهات لانهم امناء ومش ماشيين شمال وملهمش فى الشمال وطبعا هم على حق وعلى صواب هم ميعرفوش الشمال خالص لانهم يعرفوا ما هو بعد مراحل الشمال بكثير جدا الشمال مبياكلش عيش الايام دى
طبعا هم ابرياء اللى لهم فى الشمال احنا احنا الشعب الغلبان المتحمل الصابر اللى بيدفع من قوته وقوت اولادة علشان خاطر التنمية الاقتصادية اللى بيقولوا لنا عليها احنا الشعب اللى ماشى شمال جنب الحيطان وكل الجدران ندور على لقمة عيش ولو حاف احنا اللى ماشيين شمال بنشحت العلاج من التامين الصحى ويذلونا احنا اهل الشمال اللى بنقف طوابير فى افران العيش وفى المواصلات واحنا اهل الشمال الواقفين فى طوابير البنوك والبريد علشان نصرف المعاشات فى الشمس والشخط والنطر احنا اهل الشمال اللى عمرنا ما رحنا بحر ولا شفنا ساحل ولا حتى ماء مالح خالص ولا لنا ابراج وفيلات فى التجمع طبعا لاننا ماشيين شمال
احنا اللى بنمر امام الجزارين نشمشم ونشترى بالكاد لحمة الراس للعيال ونضحك عليهم طبعا لاننا ماشيين شمال وهم كلهم ابرياء ياحرام
على ما يبدو على راى مثل جدتى وجدتكم اللى اختشوا ماتوا ولم يوجد من يميز الحلال من الحرام ولا مين عارف اللى ماشى يمين من اللى ماشى شمال لانها على مايبدو تاهت وضاعت اشارات المرور وتكسرت لمبات الاشارات فاختلط اهل الشمال مع اهل اليمين واتبدل الاحوال واصبح اللى ماشيين شمال الحقيقين فى امان وسلام ومناصب ومراكز واصبح الغلابة اللى ماشيين يمين بجد هم من حلوا محل اللى ماشيين شمال وبيتهمومهم بالباطل والزور والبهتان انهم اهل الفساد على اية هنحسد الاعمى على قفه عيون معلش ايها المواطن الغلبان اتحمل تهمة انك ماش شمال بجملة اللى انت فيه مفرقتش وخلىهم اهل البلطجة والعربدة واصحاب رؤؤس الاموال من حرام من اللى ماشيين يمين والى يوم الحساب هنعرف وهيعرفوا مين كان شمال ومين كان يمين
مش كده ولا ايه