الفصل الأول
الزمان:أحد أيام شهر يوليو 2021
المكان: شركة مياه الشرب بابى قير بالإسكندرية
صباح الخير يافندم من فضلكم عندى شكوي
اتفضل يامواطن اسحب رقم وانتظر دورك
حاضر يافندم
بعد مرور خمس الدقائق صوت الإذاعة الداخلية تعلن :العميل رقم 53 شباك رقم 1
صباح الخير يافندم
أهلا وسهلا يامواطن
من فضلك انتوا باعتين طالبين منى اكتر من 1200 جنيه ميه مع ان الشقة اصلا مقفولة ومفيهاش حد، وكمان الكعب اللى حضراتكم باعتينه بيقول إن القراءة اكتر بكتير من العداد وادى صورة قراءة العداد لو مش مصدقنى!
ولا يهمك يا مواطن اتفضل روح الشقة النهاردة وبعدين افتح الميه شوية لحد ما يتحرك متر على الأقل وصوره تانى وتعالى بكرة بالقراءتين.
فى اليوم التالى
اتفضل يافندم قراءة العداد قبل وبعد استهلاك متر مياه.
تمام تمام اتفضل ده رقم الشكوى وسيب تليفونك علشان نقولك النتيجة وعلى فكرة لو مفيش حد فى الشقة ممكن نعملك بلاغ بكده عشان متدفعش حاجة!
ياريت ويبقى كتر خيرك.
تحب البلاغ يبقى بإلاغلاق سنة ولا 6 شهور بس؟
لا سنة كاملة يافندم!
اوك اتفضل شرفتنا.
(وبعد مرور خمسة أيام تقريبا تلقيت اتصالاً من الشركة)
احنا بحثنا الشكوى فعلا يافندم واكتشفنا ان حضرتك عندك حق وإننا اخدنا منك فلوس ميه حضرتك مستخدمتهاش لسه ، طبعا مش ممكن نرجعلك الفلوس دى لكن نوعدك نخصمها من أى فواتير جديدة فى المستقبل!
ألف شكر يافندم والله فعلا مصر لسه بخير طالما فيها امثالكم.
الفصل الثانى
المكان شركة مياه الشرب بابى قير
الزمان: 27سبتمبر 2022
صباح الخير يافندم حضراتكم باعتين عايزين منى 883،50 جنيه استهلاك ميه مع ان الشقة مقفولة وانا مبلغ عند حضرتك هنا من السنة اللى فاتت!
غريبة ده الكومبيوتر بيقول انه محسوبلك استهلاك 30 مترا كل شهر!
ازاى بس والشقة مقفولة وانتوا كلمتونى السنة اللى فاتت وقولتولى ان انا ليه عندكم فلوس؟
اهدا بس حضرتك ولو ليك حق هتاخده بس ليه حضرتك ماشرفتناش فى يناير عشان تجدد بلاغ اغلاق الشقة؟
يافندم لانى لما بلغت فى يوليو عرفتونى ان البلاغ مدته سنة،ثم آدى صورة العداد بتقول ان رقم القراءة اللى بعتينهولى فى الكعب اكتر بكتير من الحقيقة
برافو عليك يامواطن انك صورت قراءة العداد، عايزين من حضرتك بس تتفضل تروح الشقة وتفتح الميه يجى كده قد متر ميه ولا حاجة وتصورلنا العداد تانى وتشرفنا بكره.
(28 سبتمبر 2022)
صباح الخير يافندم اتفضل آدى القراءة اللى بتثبت إن الكعب بتاعكم غلط وان لسه ليا فلوس عندكم!
تمام تمام هنبحث شكوة حضرتك ونرد عليك ولا يكون عندك شاغل واتفضل كمان آدى رقم شكوتك 568798 بتاريخ 28 سبتمير 2022 وزى ماحضرتك عارف يومين تلاتة بالكتير ونرد عليك، وآه بالمناسبة تحب نبلغ لحضرتك ان الشقة مغلقة؟
ياريت يبقى كتر خيرك ولو ان مبلغ من السنة اللى فاتت لكن الظاهر الكومبيوتر بتاعكم هنج ولا حاجة!
مغلقة سنة يافندم ولا 6 شهور؟
لا سنة من فضلك أهو من شهر 9 سنة 2022
(طبعا منذ ذلك التاريخ لم اتلق أى اتصال من الشركة التى يبدو أنها قد اسكثرت حتى ولو اتصالاً مثل اتصال العام الماضى الذى ابلغنى كذبا أنى دائن ولست مدينا للشركة.وكلما حاولت معرفة مصير الشكوى الجديدة فشلت ولم أحصل سوى على بعض ابتسامات تؤكد أن بحث مشاكل الناس وحلها ورد حقوقهم من الشكليات غير المهمة،لكن المهم إيه رأى حضرتك فى النظام؟!
