جريدة الاخبارية سياسية::شاملة::مستقلة
مقالات مشابهة
ولِسّاها مِنِينْ مَـ يْنَامْ … تنام فى عِينيه وتِحْكِيلُهْ
ولِسّاها … مِنِينْ مَـ يْنَامْ …
تنِاَمْ فِـ عِينيه وِتِحْكِى لُهْ
واذَا اتْأَخّرْ …
تحُومْ حَوَالِيهْ معَ الذّكْرَى
وِتِدَحْلِبْ مَعَ الأحْلامْ …
تِضفّرْ لِيلها مع لِيلُهْ ….
ولَمّا فَـاحْ … كَعود فـَواح …
” فتُقْرُشْ مَلْحِتُهْ الأيَّامْ “…. (٢)
لَكِنّهْ وَاقِفْ عَلَى حِلْمُهْ … كَمَا الدّدَبَانْ
فيتهْمُوهْ بأىّ كَلامْ :
- دَا وَادْ شاعرْ بِيُعْصُرْ شَهْدْ مِنْ قُولُهْ
- دَا وَاد مَغرورْ … ورَافِعْ فينا مَناخِيرهْ
- دَا كُلّ كَلامُهْ مِتْذَوّقْ … وآااهْ مِن حرف مَعْسُولُهْ
- حَيَا اللهْ فَصِيحْ ومِتْعَلّمْ …. وإيهْ يَعْنى
مـَ يَامَا نَاسْ بِتِشْبِى لُهْ (٣)
وهِىّ …. سَاكْنَةْ نِنّ عِنِيهْ
لا لِيهَا دَعْوةْ بِاللّى يُقُولْ … وَلا اللِّى يِعِيدْ
وَلا شَاغْلِينْهَا عُزَّالُهْ
وهِىّ …. سَاكْنَةْ نِنّ عِنِيهْ
بتتشاقى مع الحواديت
وتِتْمَشّى مَابِينْ الحِلْمْ والمواعيد
وتِسْتَنّااااهْ …
مِنِينْ مـَ ينَامْ … تُضُمّ عِينِيهْ وِتِحْكِى لُهْ …
وِجَايْبَه لُهْ فـِ طَرْحِتْهَا …. دِيوَانْ
أشواق
وقَلْبْ قَصِيدَةْ مَجروحة
وَحَدُّوتِةْ جدع مُشْتَاقْ
وهَاَتْ يَاحَدِيتْ … وِخد يَاكلامْ
لحد الليلْ … م نَام لِيلُهْ
ف يغْضَبْ … ونِفْسُهْ يْنَامْ …
تُقُومْ تِسْتَاءْ … وِتِسْتَغَرَبْ
يِلِفْ شِمَالْ … يِلِفْ يِمينْ
يشِدْ فِى شَعْره م الجَنْبينْ
ويِخْبَطْ رَاَسُهْ فِى وِسَادْتُهْ
كَمَا المَجَانينْ …
ونِفْسُهْ يْنَامْ …
وهى … مُصِرَّةْ يقوم ويسمعها
فتِهْمِسْ لِه بِصُوتْ مَبتورْ
ورَعْشِةْ صُوتْهَا نُـورْ عَلىَ نُـورْ
فَ يبْكِى منْ بِدَايِةْ الدّورْ
وقبَلْ مـَ تِحْكِى أَوْجَاعْهَا - بقَوُلّكْ إيهْ … :
مَ تِصحى تِسْمَعْ القِصَّةْ
ومِينْ بَاعَكْ ومِينْ وَصَّى
ومِينْ بَانِتْ عَلِيهْ خِسَّةْ
ومِينْ زَيِّفْ لِنا العناوين ؟
يلف عنيه شمال ويمين …
ويِتنهد …
فـَ تِرْجَعْ تَانى تِهْمِسْ لُهْ …… : - عشَانْ خَاطرى … قُومْ اتْقَصَّى
دِى مِشْ مِحْتاَجَةْ غِيرْ بَصَّةْ
وشُوفْ مين اللّى كَانْ مَخدوعْ
بَلاشْ سَلْبِيَّةْ فىِ المَوْضُوعْ
تُرُدْ عَلِيهَا أَوْجَاعُهْ … : - مفيش سَلْبِيّةْ وَلا حَاجَةْ
وَلَا الحَدُّوتَةْ مِحْتَاجَةْ
مَادَامْ الجرْحْ … طَهّرْنَاهْ
وقَلْبْ دَاسُوهْ … وطَيِّبْنَاهْ”
ودَرْسْ… وضَيّعوا مَعْنَاهْ
وإيشْ يـَ اخْدِ الجَعَانْ مِ الجُوعْ ؟ (٤)
مفيش سَلْبِيّةْ فى الموضوغ
……. ……. ……..
فـَ تِتْعَجّبْ عَلى رَدُّهْ …
وتِتْعَجِّب مِعاَهَا دموع : - مفِيشْ سَلْبِيّةْ فِى المَوْضُوعْ ؟
وإيشْ يـَ اخْدِ الجَعَانْ …. مِ الجُوعْ ؟
كَاَنّكْ طِبْتْ …. مِشْ مَوْجُوعْ ؟
وفِينْ حَقّكْ … وفِينْ حَقّى
وكَسْرةْ حِلْمِنَا المَفْجُوعْ ؟! .
وفِينْ حَقّكْ … وفِينْ حَقّى
وكَسْرةْ حِلْمِنَا المَفْجُووووعْ ؟!
…… …… ……. - وفَجْأَةْ يقوم …. عَلَى تَخَابِيطْ
مَفِيشْ فِى دِماَغِه غِير… شَخَابِيطْ
وصُوتْ … مِنْ بِعِيدْ بِيْقوووولْ ….
دوانا نور فِى طيف ” مَرْيَمْ”
دوانا نور فى صَبرِ ” يَسُوعْ “
دوانا نور فِى طيف ” مَرْيَمْ “
