و أخبار كوكبنا العجيب…
السودان….
وبعد ما إتلم تنتون على تنتن…. والإتنين انتن من بعض….
وبعد ما إتلم عليهم عبدالله الحمدوك رئيس الوزاراء السابق الموالي لأمريكا اللي كان بيكره الجيش السوداني كره العمى
خرج علينا حميدتي من اثيوبيا وهو مستحمي ولابس بدلة العيد وقال….
لا بد من تسريح الجيش السوداني وإنشاء جيش جديد لبناء دولة سودانية جديدة بقواعد جديدة….!!
الله الكلام ده سمعناه فين قبل كدا…!!
أيوا…. كنا بنسمعه سنة ٢٠١١ من الثوار الأحرار والورد اللي فتح في جناين مصر اللي بعد كدا إكتشفنا إن كلهم عملاء أمريكا ع الأرض حضرتك….!!
يبقا اول هدف من كل اللي بيحصل ف السودان هو القضاء ع الجيش الوطني السوداني بقيادة البرهان
إفتح بقا القوس وحط جمب إنهاء وجود الجيش العراقي الجيش السوري والجيش السوداني … يبقا بعد كدا الدور على مين…؟؟
ايوا انت كدا اشطر كتكوت وعرفت من نفسك ان كل اللي بيحصل في المنطقة هو إنهاء وجود الجيوش الوطنية ونرجع بقا لايام الإحتلال الجميلة والإنتدابات الوسطية الجميلة
بس حميدتي مسكتش على كدا….وقال
إحنا يا جماعة مش جايين علشان نحارب الشعب السوداني
إحنا ناس كيوت وإتفرض علينا الحرب….!!
بس إحنا عايزين نهد الدولة كلها ونطربقها على دماغ الشعب السوداني وبعد كدا نبني سودان جديدة على اللي باقي من شعبها دا إذا إتبقى حاجة منهم يعني ان شاء الله ومن غير مقاطعة …؟
طيب حط بقا آبي أحمد جمب حميدتي جمب عبدالله الحمدوك عميل أمريكا وحط جمبهم البوارج البحرية الامريكية اللي في البحر الاحمر ومعاهم البوارج الانجليزية بحجة الحفاظ على التجارة العالمية وانت هتفهم لوحدك إيه اللي بيحصل ف السودان وليه مصر مشاركتش في التحالف ده
قال تحالف قال…!!
قال علشان الحفاظ على طريق التجارة الدولية وعايزين الجيش المصري يشارك في التحالف ده….. يابني هو انت شايف الجيش المصري داقق عصافير …!!!
طيب هتجيلي واحدة بنت حلال وهتسألني فسؤال وتقولي…
طب من وجهة نظرك لو إنتي شايفة إن التحالف القذر ده معمول لحصار مصر ….
والسودانيين خلاص سلموا بلدهم تسليم أهالي هتعملي إيه …!!
هقولك والله انا شايفة إن الحل بسيط جدا وهنضرب عصفورين بحجر واحد…!!
يوم ما الجيم يقفل خالص وكل أهل الشر يتجمعوا في السودان نطربق السد على دماغهم كلهم
وبعد ما الدنيا تنضف في السودان ننقل الخمسة مليون لاجئ سوداني اللي عندنا هناك يبنوا سودان جديد على نضيف…
وع الناحية التانية من الكوكب…
أثيوبيا …
آبي احمد ف اثيوبيا بيلعب لعبة حلوة اوي وراح إتفق مع شوية عيال صيع ف الصومال مسميين نفسهم الإنفصاليين بقيادة واحد إسمه موسى بيهي…
الإتفاق ده بينص على ان أثيوبيا تعترف بإنفصالهم عن الصومال في مقابل ان اثيوبيا تاخد منفذ بحري وميناء على البحر الاحمر بطول ٢٠ كيلوا متر لمدة ٥٠ سنة…!!
طبعا زي ما كلنا عارفين ان أثيوبيا دولة حبيسة يعني ولا ليها مواني ولا ليها شواطئ على أي بحر وحاجة كدا إستغفر الله العظيم…!!
بس الموضوع مسكتش على كدا…!!
حسن شيخ محمود رئيس دولة الصومال الفعلي قالك لا معلش اللي ملهوش كبير يشتريله كبير
والقارة الأفريقية بقا ليها كبير ….!!
وراح متصل بالسيسي وقاله يرضيك ياكبير اللي بيحصل من اثيوبيا…؟؟
رد عليه السيسي وقاله إتقل…. تاخد حاجة نضيفة…
لو اردوغان عرف ياخد ميناء ف ليبيا يبقا آبي أحمد هياخد في الصومال
وزي ما حصل لأردوغان ف ليبيا لما كان عايز ياخد قاعدة الواطية ويسيطر على مواني ليبيا هيحصل لآبي احمد…
نفس العلقة لا قلم هيزيد ولا شلوت هينقص …
وراحت الخارجية المصرية مطلعة بيان ولا أروع من كدا وقالت فيه….
يجب إحترام الدول وحدودها وإحترام قرارات الإتحاد الإفريقي ….
واللي بيحصل من أثيوبيا ف القرن الإفريقي دا هيولع الدنيا
ولازم كلنا نحترم الاسس اللي قام عليها الإتحاد الإفريقي اللي بتتحججي بيه يا اثيوبيا وإلااااا…..
ساعتها اللي هيلعب مع مصر الدح …. ميقولش ممممم
طبعا في لحظة امريكا فهمت الرسالة اللي وجهتها مصر وراحت مطلعة بيان من الخارجية الأمريكية وقالت فيه…
يجب إحترام سيادة دولة الصومال….
والإتفاق ده باطل يا آبي أحمد وإحترم نفسك…
وبلاش تستفز السيسي علشان إنت مش قده ولا قد المجهولة…
وطلع ماثيو ميلر المتحدث الرسمي وقال بالحرف كدا….
نحن ننضم للشركاء الآخرين … اللي هما مصر يعني
في التعبير عن قلقنا إزاء تفاقم التوترات في العمق الإفريقي…
وقاله خد بالك يا آبي أحمد لو العاركة قامت في القرن الإفريقي ساعتها مش هتعرف القفا من الشلوت…
وع الناحية التانية من الكوكب…
إيران…
إيران إستغلت الوضع الإقليمي ورفعت تخصيبها من اليورانيوم….
مش كدا وبس….!!
دي كمان بعتت بوارج حربية لمضيق باب المندب قال إيه لتأمين التجارة العالمية…. لاء ! بجد !!؟
بس برضوا مش هو دا اللي لفت نظري ف الموضوع…!!
اللي لفت نظري بجد واللي لما تربط الأحداث كلها ببعض هتتاكد إن إسرائيل مصممة تجيب رجل إيران بس مش هي اللي هتحاربها
هي عايزة أمريكا اللي تضربها
والإستفزازات دي من ايام ترامب اللي ف آخر أيامه كان خلاص هيقلع ملط لإيران علشان بس ترد عليه علشان يبقا عنده حجة لضربها؟؟
بس إيران فهمت اللعبة وفهمت إنها هي اللي مقصودة بالفيلم الهندي دا كله
إسرائيل عارفة إن إيران محوطاها من كل الجهات من الشمال في سوريا ولبنان ومن الغرب في العراق ومن الجنوب ب حماس
حتى الميناء اللي حيلتها ع البحر الأحمر اللي هو ميناء إيلات الحوثيين عطلوه
فتعمل إيه إسرائيل علشان تخرج من الزنقة اللي زنقتها فيها إيران دي …!!!
ضربت حماس تحت وبتقضي عليها
وبتصطاد قادة الحرس الثوري في سوريا
وبتجر شكل حزب الله ف لبنان بس حزب الله فهم اللعبة ومش هينجر لحرب مع إسرائيل هي اللي محددة مكانها ومعادها
إسرائيل مصممة تجر شكل إيران علشان الامريكان يضربوها
والأمريكان لحد دلوقتي مش عايزين يدخلوا في حرب مع إيران والدليل على كدا انهم سحبوا حاملة الطائرات جيرالد فورد من البحر الاحمر
إسرائيل تسكت على كدا…. ابدا
إمبارح راحت فجرت مرقد قاسم سليماني قائد الحرس الثوري السابق اللي هو ميت اصلا…
بس إمبارح كانوا الإيرانيين بيحيوا ذكراه وراح في التفجير ده حوالي ٢٠٠ ايراني دا غير المصابين
بس لازم تاخد بالك….. لو إيران ضربت إسرائيل…. امريكا هتتدخل طبعا …؟
هانشوف …..
وع الناحية التانية من الكوكب…
اليابان….
ولسه مع كوكب اليابان وتقريبا كدا سنة سعيدة عليهم وعلى حلفاؤهم الامريكان…
وبعد الزلزال المالي والفضايح المالية اللي هناك
في زلزال ضرب اليابان بقوة ٧.٣ ريختر وتسبب في موجة تسونامي جديدة
وانقطع الكهربا عن ٣٣ الف اسرة والحكومة اليابانية بتحاول تنقذهم علشان في جزر كاملة هتغرق بسبب التسونامي…
مش كدا وبس..
دا في طيارة عليها ٤٠٠ راكب ولعت كلها وهي في مطار طوكيو
مش كدا وبس…
دا في طيارتين ركاب دخلوا في بعض وهما نازلين في مطار طوكيو….
هو مطار طوكيو ده ملهوش اهل يسألوا عنه…
طب أقولكم على الخبر الأفظع ويمكن ناس كتير متعرفهوش…!!
اليابان هي تاني اكبر دولة مديونة في الكوكب بعد امريكا …
وديونها السيادية اللي مش عارفه تسددها وصلت ل ١٠ ترليون دولار…!!
لاء ثانية واحدة بس …
هما موش ١٠ مليار دولارحضرتك
دول ١٠ ترليون دولار ديون اليابان…
ايوا كوكب اليابان متعثر جدا في ديونه الخارجية وإحتمال قريب جدا يحصل فيها إنهيار إقتصادي
وع الناحية التانية من الكوكب….
أمريكا….
ف ولاية نيڤادا ف أمريكا….
محكمة عادية جدا والمحامي بيترافع عن المتهم وبيطالب بالإفراج عنه بكفالة علشان التهمة يعني ما تستدعيش انه يتحبس وكدا
وخصوصا ان المتهم كل اللي عمله انه ضرب واحد في الشارع…
ف القاضية….. خد بالك انها قاضية …
وبعد ما المحامي خلص مرافعة راحت القاضية ماري كاي قالت….
مممم أعتقد إنه حان الوقت ليتذوق شيأ آخر وراحت طساه حكم بالحبس لمدة سنة
الموضوع يخلص على كدا ….ابدا!!
راح طالع المتهم وناطط فوق الطاولة اللي قاعد عليها القضاه ونزل ضرب في القاضية اللي إسمها ماري دي ورزعها كام قلم على كام بونية وقالها إحبسيني بقا علشان ضربتك
الستات والله إتجننت ….
قال إيه تقوله انا حاسه انك لازم تدوق حاجة تانية غير الكفالة …. اصل طعمها مزز شوية
طب ما ندوقك الحبس ونحبسك…!!
الراجل الدم فار في نفوخة وراح ناطط قدامها ونازل ضرب فيها….
وع الناحية التانية من الكوكب…
روسيا….
في روسيا بقا تقريبا كدا زلينسكي اخد حباية الشجاعة وضرب صاروخين على بيلجراد موت اتنين روس…
قام الجيش الروسي رادد عليه ب ٩٩ صاروخ وضلم كييف كلها…
طلع زلينسكي يعيط ويقول في نص مليون اوكراني ف كاييڤ العاصمة اتقطع عنهم الكهربا ووسائل التدفئة
