مفيد فوزي في برنامج حديث المدينة راح بلد الفنان المطرب محمد ثروت ووقف قدام فيلا مكتوب عليها فيلا المهندس محمد ثروت وقال ديه فيلا الفنان محمد ثروت وفي مصنع ومزرعة كمان لمحمد ثروت وبعدين راح سأل محمد ثروت وقاله ليه كاتب علي فيلتك ” فيلا المهندس محمد ثروت” مش “الفنان محمد ثروت” فرد عليه وقاله
لأن أنا مهندس ولولا الهندسة مكنتش عملت حاجه من اللي انت شايفها ديه فرد عليه مفيد فوزي وقاله: الله يعني الفيلا والمصنع والمزرعة مش من الغناء فرد عليه الفنان محمد ثروت وقاله:
أنا لو كنت اعتمدت علي الغناء بس كنت شحت بس يا استاذ مفيد أنا هقولك على موقف حصلي زمان مع رجل الأعمال الكبير م عثمان أحمد عثمان (مؤسس شركة المقاولين العرب_ أحد أكبر شركات المقاولات في الشرق الأوسط)، لما باشمهندس عثمان سمع صوتي نادني وقالي تعالي يا محمد وقالي كلمة عمري ما نسيتها قالي
” يا محمد انت مهندس اوعي تنسي في يوم انك مهندس لأن الهندسة ديه هي اللي في يوم من الايام هتنقذك لما الحال يضيق عليك”
وفعلاً يا استاذ مفيد الهندسة هي اللي سندتني دلوقتي يعني أنا دلوقتي مش بشتغل زي زمان ولا كنت بغني في “نايت كلاب” ولا حاجة ولولا الشغل اللي عملته بالهندسة كنت زمانك طالع في برنامجك دلوقتي بتقول في مطرب من المطربين الكويسين اسمه محمد ثروت بس الحال ضاق بيه واحنا بنلمله فلوس عشان يعرف يعيش..
