استغلال غبي من شركات المحمول للمواطنين:
سافرت الي ايطاليا لحضور مؤتمر دولى يوم الاثنين الماضي ٨ يوليه وعدت امس السبت ١٣ يوليه ١٠.١٧ مساء،،، انا عادة بقفل خدمات الموبايل المحلي او “السيل cell data” التي تستغلها شركاتنا المحترمة،، وبمجرد وصولى مطار روما كان مطلوب منى افعل تذكرة قطار المطار اون لاين والتي ارسلها لي المؤتمر ففتحت الموبايل وقبل ما ادخل على انترنت مطار روما المجاني وصلتني رسالة من فودافون بتقول خصم ٧٠ جنيه من رصيدك مقابل خدمة يومية للتجوال دون ان اطلب ذلك وعافية يعنى ومن غير مايسألونى تلزمنى الخدمة من عدمه!!، طيب مش مشكلة،، فعلت التذكرة وكلمت الدكتور رئيس المؤتمر على الفيس تايم ابو بلاش في مكالمة نصف دقيقة قلت نصا:- ركبت القطار وسأصل الي محطة الفندق الساعة كذا برجاء ارسال السيارة التي ستأخذنى للفندق،، يعنى والله المكالمة وتفعيل التذكرة لم يستغرقوا دقيقتين!!،، وصلتني رسالة من فودافون لقد استهلكت١٠٠٪ من الباقة اليومية!!! اي سبعين جنيه في اقل والله من دقيقتين،،، طيب الله يسامحكم قفلت ال cell تاني وكل شوية يقتحموه ويبعتولي رسالة يقولولي افتح السيل cell حتى تتحسن الخدمة وانا فاهم انهم عايزني افتحه علشان يقولوا قفشناك ياحلو ويخصموا فلوس تجوال دون اذن او طلب او حاجة منى!، ثم افتحه ليه والفندق فيه انترنت والمؤتمر فيه انترنت وحتى القطار فيه انترنت،، وانا افضل ان احافظ على رصيدي للطوارئ في الغربة،،، ومع ذلك ووانا قافل ال cell اقتحموه وبلغونى بأنه تم خصم تجوال يومى جديد بمبلغ ٧٠ جنيه!!! بدون اخذ رأيي ورغبتي في التجديد ام لا ارغب يعنى عافية وكمان والموبايل مغلق ولاغي الخدمة!!!
امبارح وانا راجع وصلت مطار روما ودخلت على انترنت المطار المجاني وكلمت مدير مصر للطيران هناك على الفيس تايم ابو بلاش،، في مكالمة اقل من دقيقة،،، ثم وصلتني رسالة من فودافون بتقول ان تكلفة المكالمة ١٦ جنيه!! ليه هو الفيس تايم بتاعكم ولا الانترنت بتاعكم ولا اممتوه؟! ده انترنت مطار روما؟! وانا اصلا قافل اتصالات الموبايل معكم عن طريق cell اي الموبايل المصري!!!
عايز تضحك اكثر وتشوف الاستغلال،، الطيارة وصلت مطار القاهرة الساعة ١٠.١٧ مساء،، فتحت الموبايل المصرى علشان اكلم ابني على الخط المصرى وابلغه انى وصلت ويجيلي بعد ساعة ياخدني،، بعد ربع ساعة من وصولي مصر الساعة ١٠.٣١ مساء وانا في مطار القاهرة وصلتني رسالة جديدة من فودافون بتقول تم ادخالك على خدمة التجوال في الخارج وخصم ٧٠ جنيه من رصيدك!! تجوال ودولي وانا في مطار القاهرة؟! يعنى انا في مصر وتحاسبوني على انى لسه في اوروبا؟! يعنى سرقة تقول ،، استغلال تقول،، استباحة المواطنين تقول بسبب انعدام الرقابة سواء على الشركات او غيرهم وتسليم المواطنين لهم ولاستغلالهم؟
هذه ياحضرات شركاتنا واحوالهم وهذه احوال المواطن المسالم،،
جميع الرسائل موجوده وسأنشرها بالتوقيتات!!!
