حاجة كدة مش عجبانى ولا عمرى فى السياسة سمعتها من عظماء العمل البرلمانى بشقية نغمة نشاز ظاهرها الرحمة ومضمونها الباطل نغمة بيستخبى ورائها فشلة النواب الذين اصبحوا نواب بمحض الصدفة البحتة او بحظ العوالم او باموالهم وهم عاجزين عن تقديم الخدمات لدوائرهم او حتى عاجزين عن ممارسة مهامهم الرقابية والمتابعة وعاجزين حتى عن المناقشات المثمرة بيستخبوا خلف نائب شغال بارز عندة فكر ويقولوا قال اية نحن مع العمل الجماعى للنواب ازاى يعنى تناموا وتشخروا وتقبضوا بالالاف كل شهر وتستخبوا طيب اخزوا العين واعملوا حاجة توحد ربنا طيب استغلوا ان الشعب وثق فيكم مرة لانكم مش هتشفوها تانى الا باموالكم وهذا خارج عن ارادة الشعب اللى بيمثل الناخبين
يابهوت العمل الجماعى للنواب كان زمان لما كان فية قامات كبيرة تقود النواب ومش فى كل الاماكن عندنا كان العمل الجماعى ايام السيد مرعى فكان القائد للكل بحكم منصبة وعملة وبيساعد النواب فى قضاء مصالح وخدمات الناس فقط وكان زمان ما كان يسمى برئيس الكتلة البرلمانية لمحافظة كذا مثلا فكان يقود النواب كتنظيم انما النواب عليهم خدمات وواجبات للناخبين لا يصح فيها بدعة ونغمة العمل الجماعى للنواب لانها مثل الالعاب الرياضية الفردية كل واحد بمجهودة وعطائة ومفيش فيها مجاملات ولا حد بيشيل حد الكل بمجهودة والكل مكشوف اما الجماهير اقصد الناخبين واللى بيحقق بطولة اقصد خدمة معروف وبمجهودة سواء اكانت خدمات عامة او خاصة فالناخبين محتاجين ومتعطشين للخدمات
التمسح فى جماعية الاداء وجماعية العطاءات دى لامؤاخذة حجة البليد على راى المثل لية لانها بتخلق ديكتاتورية بتعمل طراطير وامعات ودلاديل وطبعا دة عيب فى حق نواب الامة اللى المفروض يحفظوا على كرامتهم واوضاعهم لانها من كرامة الناخبين لكنها اصبحت خيبة وويبة ان يكون نائب منتخب من الشعب ويفرط فى كرامتة وكرامة الشعب اللى انتخبة
من الاخر يابهوات العمل الجماعى اعرفوا ان الناخبين اذكياء وعارفين مين اللى بيخدم ويعطى ويجتهد ومين بتاع الخدمات الجماعية زى النقل الجماعى كدة كلة بيركب وبالسلامة الناس عارفة وفاهمة وللاسف الشديد تلاقى النواب اللى بتخدم وبتتعب وبتجتهد الناس بتهاجمها والنائمون فى العسل ولا حس ولا خبر اهم فى النواب الجماعى والسلام ولا هجوم ولا عتاب على راى عبد الحليم بلاش عتاب ياحبيبى ياسادة يابهوات النواب الجماعى اعيدوا حساباتكم وحللوا فكافاتكم الكبيرة واخلصوا العمل والنية وراعوا الناس اللى انتخبوكم واعملوا حاجة يارب حتى 5 متر مواسير مياة لشارع او عمودين كهرباء او حتى حنفيتين لمسجد اعملوا حاجة قرفتونا بس كلام وثرثرة وصور وعزومات اعرفوا ان القائمة لن تدوم ولو اترشحتوا فردى ابقوا قابلونى لا جماعية هتنفعكم ولا ناخب هيقف معاكم تانى وبكرة تقولوا انى كنت على حق
مش كدة ولا اية
