كتبت – سامية الفقى
ردت الفنانة بشرى على الجدل والانتقادات التي توجه لمسلسل “سيد الناس“.
وقالت بشرى في لقاء مع ET بالعربي: “هو في مسلسل مش عليه جدل ولا انتقاد ولا هجوم لو اتفقت الأذواق هتبور السلع، مفيش مسلسل لمحمد سامي مش عليه جدل وهو عنده مسلسلين هذا الموسم أنا بتفرج على “إش إش” وبحبه جدا مشدودة ليه أنا والأسرة واتفرجنا قبلها على “نعمة الأفوكاتو”، أنا مليش دعوة بحالة الجدل أنا ليا اللي قدامي بيبسطني بالعمل ولا لأ أنا مشدودة ولا لأ قفلة الحلقات بتشجعني أشوف الحلقة اللي بعدها ولا لأ إنما الكلام الكتير دي بقيت سياسة السوشيال ميديا في أي حاجة، مبقتش فارقة بالنسبالي اللي يهمني العمل وردود أفعال الناس العادية الطبيعية اللي في الشارع”.
وعن تعاونها لأول مرة مع المخرج محمد سامي قالت بشرى: “المخرج محمد سامي دايما عليه حالة جدل مستمرة حبيت استكشف هل الجدل دا على حق ولا الكلام دا كله هجص زي ما بيقولوا، لقيت أن هو راجل بيحب شغله أوي ودقيق جدا ولما بيزعق أو بيضايق بيبقى عشان في استهتار أو في ناس مش ملتزمة ومش دقيقة بعض الناس معندهاش ضمير في الشغل بيبقى غضبه على حق لكن هو بيحترم المحترم وبيقدر الشاطر جدا والمستهتر أو اللي محتاج أنه يركز أكتر هو اللي بيتكلم معاه”.
