الدولار وما ادراكم ما هو الدولار اصبح ازمة المصريين بل اصبح بعبع الاقتصاد المصرى كله كل شئ اصبح ينسب الى الدولار زيادة اسعار يقولوا الدولار اختفاء ادوية او قطع غيار للسيارات يقولوا الدولار وكان هذا الدولار مكتوب علينا فى هذه الايام بالذات
كان زمان ياسلام الدولا عديم القيمة عند المصريين ولا كان له اى لازمة ولا عوزة ولا كنا زمان حد بيجيب سيرة الدولار ولا كان له اى تاثير على الاقتصاد المصرى ايه اللى جرى معرفش ولماذا اصبح الدولار وانضم اليه شقيقة اليورو وابن اختهم الجنية الاسترلينى مضدر عكننة وازعاج بل وصل لحد ارهاب الاقتصاد المصرى والشعب المصرى
مشكلة الباشا الدولار مش فى ارتفاع قيمته السوقية مقابل الغلبان الجنيه المصرى لا للاسف مشكلتة اصبحت فى عدم توافر الدولار فى السوق او فى البنوك نتيجة عوامل متعددة ملناش دعوه بها ولا لنا فيها اى ذنب بهوات الاقتصاد ورجال الاعمال هم اللى عارفين الاسباب والكل صامت علشان الكل بيستفيد منهم من كون ثروات طائلة من وراء الدولار واسموها الاتجار بالعملة ومازالت حتى الان منتشره ومتواجدة دون انحصار والبعض الاخر عمل ودائع دولارية ومع ارتفاع اسعار لدولار يوم بعد يوم بتتورم الجيوب وبتزيد الارصدة والثالث كده كده مستفيد كل ما الدولار يرفع يرفع هو كمان الاسعار ويادار مدخلك شر حتى بياعين الفجل والجرجير اللى عمرهم ما شافوا دولار ولا مسكوه يقولك الدولار غلى يابيه هنعمل لك ايه اصبحت مشكلة الدولار مسخة ونكتة من نكات المصريين
والعجيبة والغريبه رغم كل ما نعانية تطالعنا الاخبار فى كل مكان يوميا من مهازل انفاق الدولارات فى مصر فنحن نعانى ونتحجج بنقص الدولار وعدم توفر سيولة لاستيراد السلع ذات الاهمية مثل الدواء وغيرة نجد لعبة كرة القدم بتنفق مليارات الدولارات بكل سهولة ويسر وكاننا لا ازمة ولا ندرة ولا حاجه خالص كل يوم الزمالك مطالب بملايين الدولارات باحكام من الفيفا وهب يدفعوا منين معرفش وكل يوم تعاقدات بالدولارات بالملايين ازاى مش عارف والمصيبة الاكبر الاهلى اللى قالوا عليه مدرسة فى التعاقدات هب غلطة فى عقد مدرب هيدفع فيها الاهلى 3 مليون ونصف دولار منين مش عارف وتعاقدات مع لاعيبة كرة قدم بملايين الدولارات والنتيجة اية صفر وموضة استقدام حكام اجانب علشان المصريين دمهم تقيل وكل حكم ياخد 50 الف دولار فى المباراة وياسلام سلم طلعت لنا موضة المدربين الاجانب مرتبة هو كمان بالدولار وبيعيش فى فنادق وياكل بالدولار وضيعنا المدربين المصريين ولا عاد فيه الجوهرى ولا حسن شحاتة يجيبوا لنا بطولات كله بقى بالدولار حتى الموضه الجديد الاهلى قبض زيزو المصرى بالدولار امال ايه الدولار متوفر وموجود بكل بساطة فى لعبة كرة القدم اما الدولار فى استيراد المهمات الضرورية لحياة الناس فيه نقص وغير متوفر طبعا لان فيه فرق بين دولار الرياضة والاندية والالعاب ولونه اخضر وبين دولا استيراد السلع ولونة اصفر باهت
طيب الاندية دى بتجيب الدولارات دى منين ونعملها ازمة فيما يخص الناس ونتعلل بالدولار فى كل شئ هو حلال فى الرياضة واللعب وحرام علينا كشعب غلبان مش لاقى العلاج ولا عارف يشترى قطعة غيار
الموضوع فيه ان وممكن يكون الدولار مظلوم متوفر للعيال اللى بتلعب وغير موجود للناس المريضة اللى بتعانى ووصل تاثير الدولار لبياعين الفجل والكرات والجرجير
محدش هيحاسب الاندية دى منين وفين جبتم وانفقتم الدولار ولا هنفضل فى حالة صمت وتوهان
مش كده ولا ايه
