ياسلام سلم وربنا يهدينا جميعا ويجعل اقوالنا مثل اعمالنا نقول بما نعمل ونعمل بما نقول ربنا ينجينا من البهوات اللى بتستخف بعقولنا ومفكرين لامؤاخذه اننا هبل وبينضحك علينا فعلا مفكرين نفسهم قيادات بجد ومفكرين ومجددين بجد ونسيوا كلهم انهم فى عالم سياسة الاطفال الصغار وانعدام القيادات الحقيقية الكبيرة اللى بيكون لها كلمة وبترعى مصالح الوطن رعاية حقيقية وبتدعم البلد بحق وبتقف جنب الرئيس بالاعمال اللى تشرف مش فنجرة بق وحنك وخلاص
احنا بندعم الدولة واحنا بنؤيد الرئيس عبد الفتاح السيسى والكل يهيص ويزيط ويصفق جملة بنسمعها كل يوم مرة واثنين فى كل مؤتمر ومن كل القيادات وكانها لحن اسطورى يتغنى به الجميع
طيب ازاى حضراتكم بتدعموا الدولة وبتدعموا الرئيس السيسى وانت اصحاب البذخ فى الانفاق على مؤتمرات واحتفالات ضخمة لا لزوم لها ولا معنى ملايين الملايين تهدر كل يوم بحجة دعم الدولة ودعم الرئيس لا يابهوات الفزلكة والفشخرة وحب الظهور اللى عايز يدعم الدولة المصرية ويدعم الرئيس يحول كل هذا الانفاق والبذخ الغير مبرر الى مشاريع وتبرعات لصالح مشاريع الدولة يوجه الاموال الضخمة اللى جمعتوها الى خزانة الدولة بدلا من الفراشة ومكبرات الصوت والاحتفالات الفارغة فى استاد القاهرة بالغناء والرقص والى جيوبكم وارصدتكم فى البنوك وكاننا فى دولة متقدمة لا تعانى من مشاكل وتواجه صعوبات
فعلا اللى مبيشفش من الغربال يبقى اعمى مش شايفين حجم المعاناة مش شايفين حجم الاحتياجات المطلوبة للبلد كم انفقتم فى كلام فارغ محسوم لا لزوم له ولاحاجة به اى انتخابات تستحق كل هذا الانفاق يبقى موت وخراب ديار امال لو مكنتش قوائم وتعيينات كنتم صرفتم ايه مليارات
اوعى حد يقول من جيوبهم لا ياشاطر من اموال الشعب ومن اللى بيخدوه من الشعب وكلنا عارفين بعض منين وفين وازاى وامتى مفيش حاجه بتستخبى
اعملوا دعاية كما تريدون واهتفوا واضحكوا علينا زى ما انتم عايزين بس بلاش تقنعونا انكم داعمين للدولة ولفخامة الرئيس لانه لا يحب المظاهر ومحدش يقدر يضحك عليه فاهم وواعى لكن مش فاضى لكم الايام دى اعملوا زى ما نتم عايزين وراعوا شعور الناخبين اللى هينتخبوكم راعوا معاناتهم ومشاكلهم راعوا ناس مش لاقية رغم العيش ولا توفير احتياجات اولادهم وانتم بتصرفوا الملايين على خطب وضحك وكذب ونفاق اربطوا الاحزمة فى مصاريف الانتخابات كما يربط الشعب الغلبان الاحزمة على البطون حتى تتساوى الامور ونصحح الاوضاع
انتم غير داعمين للدولة ولا داعمين للرئيس لكن الشعب الحقيقى هو الداعم والمؤيد بجد وحقيقى للدولة وللرئيس اما انتم فحدث ولا حرج وكفاية عليكم كده
مش كده ولا ايه
