هو ليه في رجالة كتير لما يمشوا في الشارع عينيهم تروح لأي ست تعدي؟ حتى لو ماشيين جنب مراتهم؟ هو الموضوع بقى عادة ولا قلة تقدير ولا ايه بالظبط؟
تخيل كده ست ماشية مع جوزها، المفروض حاسة بالأمان والاهتمام… وفجأة تلاقيه باصص يمين وشمال، مركز مع كل واحدة غيرها. احساس صعب اوي، يخليها تحس انها مش كفاية، او انها مش شايفها بعينه زي زمان.
طب يا سيدي، ما كلنا بنشوف… محدش هيغض عينه 100%، بس في فرق كبير بين نظرة عادية وبين تركيز ونظرات ملحوظة بتجرح اللي معاك. الاحترام مش كلام بيتقال، الاحترام بيبان في تصرفات صغيرة زي دي.
الموضوع مش غيرة وخلاص… دي كرامة. الست لما تحس ان جوزها عينه زايغة، بتبدأ تفقد الثقة واحدة واحدة. وبدل ما العلاقة يبقى فيها راحة، يبقى فيها شك ومقارنات وتوتر.
والأغرب ان بعض الرجالة شايفين الموضوع عادي، يقولك “ببص بس” او “مش بعمل حاجة غلط”. طب ما انت كده فعلا بتعمل حاجة غلط… لانك بتكسر احساس اللي معاك، حتى لو مش قاصد.
وفي نفس الوقت، لازم نعترف ان في رجالة محترمة جدا، عينهم مليانة بمراتهم، وده مش معناه انهم مش بيشوفوا، بس عارفين حدودهم وعارفين قيمة اللي معاهم.
العلاقة مش بس اكل وشرب ومسؤوليات… العلاقة احترام، تقدير، وامان نفسي. ولما الحاجات دي تهتز، اي حاجة تانية بتقع بعدها.
يا ريت كل راجل يسأل نفسه سؤال بسيط… هل يرضى ان مراته تبص لرجالة قدامه بنفس الطريقة؟ ولو الاجابة لا، يبقى اكيد في حاجة محتاجة تتغير.
وقولولي بصراحة… من وجهة نظرك، دي عادة عادية ولا قلة احترام؟
