جريدة الاخبارية سياسية::شاملة::مستقلة
مقالات مشابهة
بنحبك ياسيسى بنحبك ياريس هو حضرتك الوحيد اللى بتحب السيسى لا يافندم الشعب المصرى كلة بيعشق السيسى وبيحب السيسى ومقدر الدور العظيم اللى قام به السيسى لانقاذ مصر ومش ممكن الشعب ينسى السيسى ابدا ومش محتاج من حضرتك تفكرنا بالسيسى
الشعب بيحب السيسى لكنه ضد الاداء الحكومى والشو الاعلامى والبهرجة السياسية والضحك على الذقون الشعب قرف من الكلمات الرنانة وسوء الدور الرقابى والتشريعى اللى حضرتك على راسة
الشعب اللى تعبان وبيتحمل ضيق الحياة ومتحمل تبعات الاصلاح الاقتصادى وصعوباته للاسف هو اللى بيحب السيسى بجد من قلبه بدون بروبجندا او مؤتمرات او ميكروفونات لكن البهوات اصحاب الاموال والمليارديرات واصحاب الكمبوندات والساحل من حرام ممكن من حلال جائز ميحبوش السيسى ليه هم تعبانين فى حاجة هم حاسين بالشعب لازم يحبوا السيسى زى ما كانوا بيحبوا الاخوان زى ما سمو نفسهم ايامها باهل النخبة او الصفوة
الشعب الغلبان الوطنى اللى عايش على قد الايد هو اللى طلع فى 30 يونية وتصدى للاخوان ووقف جنب السيسى وجيش بلدة وعلا الصوت وغنى تسلم الايادى ووقف وتحمل ومازال صابرا هو ده الشعب اللى بيحب السيسى مش لوحدك حضرتك
هو الشعب مستنى حضرتك تفكرة بحب الرئيس لا يافندم الشعب الغلبان الشقيان بيحب الرئيس وهيفضل يتعب ويشقى ويتحمل علشان خاطر دعم وتاييد الرئيس لكن الشعب مش مكتوب عليه ولا مقرر عليه انه يفضل يشوف مواكب السيارات الفارهة التى تشابه موكب العرجانى اللى اتريقنا عليه ولا هنفضل واحنا التعبانين نشاهد الموائد الفاخرة والعزائم فى المحافظات ثم نطالب الشعب بالتقشف والصبر والتحمل وكمان نجبره على الهتاف والتهليل لغير فخامة الرئيس
يافندم اعلم انت وغيرك ان الشعب المصرى بيحب الرئيس قلت او لم تقل لكن قوموا بدوركم فى معاونة ومساعدة الرئيس يافندم خليكم فى صف الغلابه وواجهوا الحكومة وصححوا القرارات وعدلوا القوانين التى ارهقت كاهل هذا الشعب ولا انتم متعرفوش مشاكل الشعب
يافندم والله العظيم الشعب بيحب الرئيس دون توجهات منك او من غيرك الشعب مقدر الدور الكبير والانجازات العظيمة وبيحب الرئيس هو انت مفكر ان اللى بيتعمل دة دعم للرئيس لا يافندم اسف جدا ده دعم لانفسكم ولحزبكم واعمالكم لكن دعم الرئيس فى التواضع والتقشف وتقدير ظروف البلد وعدم البهرجة والقيام بالدور الرقابى والتشريعى كما يجب ان يكون بلا تهليل او تطبيل او مهادنة على حساب الشعب
طبعا كلمتين وبس النهاردة هتعمل حرقان واكلان عند البعض ولكن الارزاق على الله وبنعبر عن راى الشعب الحقيقى ومبيهمناش من اى حد
مش كده ولا ايه
