جريدة الاخبارية سياسية::شاملة::مستقلة
مقالات مشابهة
إوعى تقارن الست اللي في الشغل بمراتك… لأن المقارنة دي من البداية ظالمة.
إنت بتشوف زميلتك في الشغل في أحسن حالاتها…
لابسة حلو، متعطرة، مهتمة بنفسها، مبتسمة، وبتسمعك وإنت بتسمعها.
بينكم كلام لطيف، دعم، هزار، فضفضة…
مفيش أولاد بيعيطوا، ولا فاتورة كهربا، ولا غسيل متراكم، ولا مصاريف مدرسة، ولا ضغط بيت، ولا خناقة على مواعيد النوم، ولا مسؤولية حد مريض.
كل واحد بيرجع بيته ويشيل همومه بعيد عن التاني.
وبعدين ترجع البيت تلاقي مراتك…
اللي ممكن تكون طول اليوم بتجري ورا البيت والأولاد، ومش لاحقة تاخد نفس، ويمكن تكون آخر واحدة أكلت وأول واحدة قامت.
فتبص للاتنين وتقول:
“هي ليه مش زيها؟”
يا نجم… إنت مش بتقارن ست بست.
إنت بتقارن علاقة مفيهاش مسؤوليات بعلاقة شايلة حياة كاملة على كتافها.
وبعدين لو اتجوزت زميلتك دي، هتكتشف إن الست اللي كنت شايفها كل يوم بكامل أناقتها ورايقة وبتسمعك… بقى عندها بيت وأولاد ومسؤوليات ومشاكل، وساعتها هتعرف إن الصورة اللي كنت شايفها في الشغل ما كانتش الحياة كاملة.
عشان كده اهدا على مراتك… وخف المقارنات، وخلي حدودك مع زميلاتك واضحة.
لأن القرب الزيادة والفضفضة المستمرة والدعم اللي مالوش حدود… ممكن يبدأ بريئ جدًا، وينتهي بحاجة إنت نفسك مش عامل حسابها.
خليك فاكر:
مش كل واحدة ترتاح لها تصلح تكون شريكة حياة…
ومش كل زوجة تعبت وبقت أقل اهتمامًا بنفسها معناها إنها بقت أقل قيمة.
يمكن الست اللي إنت مش شايف جمالها دلوقتي…
هي نفسها الست اللي كانت واقفة جنبك لما مكنش عندك حاجة تتباهي بيها.
احترم بيتك قبل ما تندم عليه.
