جريدة الاخبارية سياسية::شاملة::مستقلة
مقالات مشابهة
– لابسة اسود وماسكة الآى فون رايحة فين ع المسا يا أمينة؟
– أبدا ياسى السيد داخلة أوضة النوم ياخويا!
– أوضة النوم بالإسود ده ليه خير كفى الله الشر يا أمينة؟
– داخلة أعزى ياسى السيد !
– اللهم طولك ياروح داخلة تعزى فى مين يا أمينة مانا قدامك أهو صاغ سليم انتى جرالك حاجة فى نافوخك ياولية؟
– يوه متأخذنيش ياسى السيد هو أنا ماقولتلكش ياخويا؟مش عاصم جوز الست اعتدال صاحبتى إللى فى المغربلين مات النهاردة الصبح؟
– يارب صبرنى على بلوتى يارب،طيب عاصم الله يرحمه مات وارتاح انتى بقى داخلة تعزى مين فى أوضة النوم؟
– داخلة أعزى اعتدال هو مش الناس لبعضيها يعنى ولا إيه؟
– وهى الست اعتدال صاحبتك سايبة جنازة جوزها وجاية مقيمة عندنا فى أوضة النوم ليه كفى الله الشر؟
– سامحنى ياخويا،هو انا ماقولتلكش إن الست اعتدال عاملة العزاء على الواطس آب؟
– هو بقى اسمه واطس؟طب أنا أفهم العزاء يكون فى دار مناسبات فى البيت أو حتى فى المقابر لكن عزا على الواتس آب إزاى يعنى؟
– دى وصية المرحوم قالها يا اعتدال لما أموت ماتتعبيش الناس ولا انتى تتعبى وتعملى عزا أبقى افتحى الواطس واتلقى العزا عليه وخلاص!
– وعلى كده كبير عاصى ده يا أمينة؟
– أبدا ياخويا ده ملوش تلات أربع سنين؟
– تلات أربع عفاريت أما يلهفوكى يعنى عاصى جوز اعتدال كان لسه بيرضع على كده؟
– لا أنا قصدى يعنى إنه ملوش على التيس توك تلات أربع سنين!
– مليون مرة ياولية اقولك اسمه الفيس بوك!
– طول عمرك بتاع شكليات وبس ياسى السيد.
– وعلى كده عنده كام عيل كده سى عاصى ده؟
– أبدا حوالى ألفين تلاتة بالكتير!
– عنده ألفين عيل يا أمينة فى 3 سنين؟ده أنا أروح أشوفلى قبر أرمى نفسى فيه أحسن.
– عيل إيه ياسى السيد أنا قصدى يعنى ألفين تلتلاف صديق على الحكونت بتاعه.
– هههههههههه الله يحظك ياوليه اسمه أكاونت ياجاهلة.
– أنا إللى جاهلة ولا أنت إللى مش عايز تساير العصر وتدوس معايا فى عالم السوشيال ميديا ياللى عمرك ماعملتلى لايك حتى..اشمعنى زبيدة وجليلة بتعملهم لايك فيس تو فيس؟
– والله عال يا أمينة وبقيتى تعرفى كمان السوشايل ميديا وبترطنى إنجليزى كمان؟أنا الحق عليا إللى ماعملتلكيش بلوك ولا حتى ريموف من صفحتى.
– ألا بصحيح ياسى السيد ألا إيه هو الفرق بين البلوك والرموف؟
– البلوك ده يعنى ماشوفش وشك تانى لكن الريموف أخرجك بس من صفحتى.
– طب سيبنى أدخل ألحق أعزى الولية قبل ما العزا يخلص وتعمل ليفت من الواطس أب.
– واتس أب إيه وواتس أم إيه هى حصلت حتى العزا كمان يبقى على الواتس ؟
– وماله التطور ياسى السيد دى حاجة كويسة صحيح المفروض كمان إحنا نوصى بعض..محدش ضامن عمره.
– ماتقوليش كده ربنا يطول عمرك يا أمينة.
– أحب على يدك ياخويا لو يومى كان قبل يومك إبقى اعملى العزا على الواطس أب!
– طب ولو يومى أنا قبل يومك حاتعمليلى العزا فين؟
– تف من بوقك ياسى السيد ربنا يديك الصحة لكن لو حصل ليك عليا أعملك ريموفة أخلى الجمالية كلها تتكلم عنها!
– وتطلع إيه الريموفة دى ان شاء الله يا امينة؟
– ريموفة يعنى خارجة ياسى السيد!
