حيرت قلبى معاك ودليلى احتار ودارت الايام وغيرها الله يرحمك ياست ام كلثوم فعلا والله العظيم كلام اغانى لكن عجبانى وممكن اتخذها عنوانا لهذا البوست الاضطرارى الاجبارى
كل ما اكتب اى حاجة عامة او خاصة او حتى فكاهيه اجد الدنيا تتقلب راس على عقب وكل واحد على راس اهله او راسة بطحة وما اكثر البطحات اليومين دول ياخدها على نفسة ويبدء يشتكينى للناس ويزعل ويلوم واحلف والله ياعم انت ما على بالى ولا بفكر فيك خالص ولا انت عمرى مثلا هكتب عنك ولا انت الحب اللى هحطه فى دماغى ياعم انا بكتب عن ظواهر عامة ومشاكل عامة بعبر عن اقوال واحاديث وهمسات الناس الغلابة اللى لى الشرف انى عايش فى وسطهم وواحد منهم بتاخدوا الكلام على نفسكم ليه انا ذنبى ايه ان على راس حضراتكم بطحات بلاش نكتب خالص ولا نكتب عن الكورة والرقصات وباردة مش هنخلص من المشاكل وهات يا تحفيل ووجع دماغ طيب اعمل اية يا ناس عايز اكتب وغاوى كتابه من صغرى وبرتاح لما بكتب حاجة عن الناس اعمل ايه فى انكم اصحاب بطحات يعنى انتم تعملوا بطحات وتكونوا ثروات وتكذبوا على الناس واحنا نخرس مثلا ده لا عشتم ولا كنتم ولا لكم اى لازمه عندى اللى له عندى فضل او جميل او عزومة على اكله ولو جبنه قديمة يحاسبنى عليها اللى خدمنى خدمه فى اى يوم يتفضل يعايرنى بيها اللى طلبت منه مجرد طلب شخصى يقول وانا ارفع له القبعة على عينك يا تاجر وحى على الفلاح من فوق اعلى ماذنة واللى على راسه بطحة يحسس عليها ولا يحاسب الناس الشرفاء على ما يقولون او يكتبون لانك صاحب بطحة وانت حر فى بطحاتك وبلاش عتاب ياحبيبى بلاش لانك هتتعب معايا
لن يكسر قلمى او يوقف مقالاتى او يمنعنى من قول الحقائق الا الموت وهو قدر ومكتوب لا اهاب احد ولا عندى صغير او كبير ولا غنى ولا فقير ولا بيهمنى وزير ولا غفير لا يهمنى غير قول الحق واعلاء الحقيقة وبيانها للناس بلا غرض ولا مصلحه ولا يحزنون
سلطوا اذيالكم وتابعيكم وهجمونى زى ما انتم عايزين واعرفوا انى بفرح جدا لهجومهم وسفالتهم لانه اذا اتتنى مذمتى من ناقصا فهى شهادة لى بانى كاملا
واللى على راسه بطحات مليش دعوه بيها انا هتكلم وهنتقد وهقول ومش بخاف من مخلوق وخلوا بالكم الكلمة امانة هنحاسب عليها وقول الحقيقة شهادة ولن اشهد زور ابدا اما انتم يا اصحاب البطحات نظفوا انفسكم واحلقوا البطحات اللى على رؤسكم وحاسبوا انفسكم قبل ان تحاسبوا الناس واعلموا انه من عملكم سلط عليكم واتقوا الله اتقوا الله يا اهل البطحات وعودوا الى الله تسلموا من الناس وتعيشوا فى راحة بال وهناء بدلا من توزيع الاتهامات على الشرفاء ادخلوا معانا فى طابور الشرف والامانة وحب البلد ومش مهم الان بطحات كفايه اللى على رؤسكم
مش كده ولا ايه
