هو انت صحيح ماشي؟؟
طيب هنقول لمين النيل نجاشي؟؟
دي القعدة على ضفافك متتنساشي
يتجمعوا الاهل والاحباب في حبك وانت ما تدراشي
انك سر الحياة في بلدنا طول ما انت ماشي
ولما قالولي النيل هيجف
قلتلهم انا عيني عمالة ترف
وقلبي الحزن ماليه بوجع ما بيخف
قلت اروح أقف واتكلم معاه
منا بقالي فترة محرومة من لقاه
واول ما وصلت لاقيت الحزن جواه
بيجري اه.. بس الجري مش على هواه
بصيت عليه بحنان
وعيني جابت لحد أسوان
وقلبي شايف كل بلد معدي عليها وهو زعلان
كأنه بيودع اراضينا بعد عشرة من زمان
اول مرة اشوفو بيبكي
بينادي ألحقوني يا ولدي
انا لو عليا ما افارقكم ده ما بيدي.
قلتله فراق ايه بس فال الله ولا فالك،
اومال انا ليه دلوقتي جيالك
ده احنا جزء منك احنا عيالك
وبأروحنا نفديك ونسعالك
اللي بينا وبينك عشرة سبعة آلاف سنة
شفنا فيها الخير والهنا
شوف حتى ده انا بنتك ولوني لونك
خمري وبيقلولي فرحانة انتي بأصولك
وفي كل مكان بقول انا بنت النيل
وزيي في الدنيا ما في بديل
وصابرة دايما على الحمل التقيل
ولو جفيت انت انا دموعي هتكون لضفافك بديل
هرويك بيها. واعمل المستحيل
علشان افضل دايما اسمي بنت النيل
