اه نسيتك …لسه فاكرانى بحبك
…لاء نسيتك
أنا اللى يا ما عشقت فيكى
ولا عمرى مره فى يوم رميتك
وأنا اللى ديماً كنت ليكى
وياما بدموعى رويتك
واما كنتى بتطلبنى
أجرى اقول انا ملك ليكى
ما أنتى كنتى نن عينى
بعت نفسى وبشتريكى
فأما بردو تزعلينى
حقى أقول انى نسيتك
أه نسيتك…لسه فاكرانى بحبك….
لاء نسيتك
لما منعونى انى احبك
وانتى عمرك ما أعترضتى
واما قالوا فى يوم ده سبّك
وانتى عارفه انك ما هنتى
وأنى قاصد بٌعدى عنك
وأنتى على ظلمى قدرتى
وأما قالولك ده خانك
راح وباعك للغريب
وأنى ما اعرف اثور عشانك
وأنى ما نفعكيش حبيب
وأنى ما نزلتش ميدانك
وأنى عمرى ما اشتريتك
أه نسيتك…لسه فاكره انى بحبك….
لاء نسيتك
كنتى كل الدنيا دى
والحياه بالنسبه ليا
كنتى شمسى كنتى قمرى
كنتى ايامى اللى جايه
يبقى ينفع وانتى ضهرى
أروى قلبى بالاسيه؟
لو فى مره اسيت بكلمه
ما أنتى اسيه من زمان
ياما عشتك جوه ضلمه
بس حسيت بالامان
وأما يوم أحتجتى يا أما
شلت كفنى اوام وجيتك
يااما زعلى عشان هويتك
بردو ينفع أكون نسيت؟
بس عارفه..
.لسه عاشق بردو ليلك
فى الحسين
ولا مركب جوه نيلك
ويا نايك الحزين
أيوه نفسى فى يوم اجيلك
اصّلى جوايا الحنين
لسه بشتاق للطفوله
والصحاب فى ماتش كوره
وأما مره نكون فى رحله
نجرى نتجمع فى صوره
مين يقول انى كرهتك
مين يقول انى عاديتك
مهما سبتك او بعدتى
مين يقول انى نسيتك
