( ١ )
الحب لو يوم غاب
يبقى اللقا كداب
وكلامنا رسم وزيف
وطريقنا كله سراب
( ٢ )
الحب يا محترم
في الشدة يبقى الكرم
تنطق بكلمة حق
تصمد كأنك هرم
( ٣ )
الحب يا فرسان
تفضل بلادنا أمان
والخير يعم الكل
والرحمة بالإنسان
( ٤ )
الحب يا خبراء
يمسح جروح وعداء
الحب عدل ونور
صدق وأمل وشفاء
( ٥ )
الحب يا تايهين
إيمان بيوم الدين
إخلاص في كلمة وعمل
بسمة أمل لحزين
( ٦ )
الحب يا موهوم
إنك تقوم م النوم
ترفع إيديك للسما
تسعى في طريق معلوم
( ٧ )
الحب يا مساطيل
مش بس بالأقاويل
الحب ينشر نور
يكشف ظلام الليل
( ٨ )
الحب يا بهوات
مش جمع للثروات
وتسيب فقير حيران
يائس من المتاهات
( ٩ )
الحب يا غضبان
الصبر والعرفان
مش غدر يا ابن العم
مش بيع ولا نكران
( ١٠ )
الحب يا مسئول
تنطق كلام معقول
توعد تصون الوعد
تصنع أمل وحلول
( ١١ )
الحب يا ستات
يحيا الوفا سنوات
يرسم سعادة وشوق
ويحطم الخلافات
( ١٢ )
الحب يا حساد
يحمي شعوب وبلاد
يرصف دروب الفكر
ويطارد الأوغاد
( ١٣ )
الحب يا دكتور
إنك تعيش مستور
مش فيلا أو حسابات
ولا يوم تكون مغرور
( ١٤ )
الحب يا بياع
ما تكونش يوم طماع
تحلف طلاق كداب
وتزود الأوجاع
( ١٥ )
الحب يا سواق
مش كل في خناق
ولا سير في عكس مرور
ولا فوز في كل سباق
( ١٦ )
الحب يا حكام
مش نصب ولا أوهام
الحب عهد صريح
أمن ورخاء وسلام
( ١٧ )
الحب يا أصحاب
مش أكل يوم وشراب
الحب نصح رشيد
يهزم سقوط وصعاب
( ١٨ )
الحب يا مشاهير
تخطيط مع تعمير
وزراعة مع تصنيع
ودراسة مع تطوير
( ١٩ )
الحب يا أجناد
نصنع سوا أعياد
نرفع شعار النصر
لولادنا والأحفاد
( ٢٠ )
كل الكلام اتقال
ولا حرف منه اتسمع
بقت الحياة موال
مكتوب في قصة وجع
