لمَّا تبقى ف يوم مدير
كله يجري عليك يطير
واللي هيقولك يا باشا
واللي هيقولك يا بيه
واللي هيجيبلك بُغاشة
واللي هيعظِّم إيديه
واللي يسأل عن ولادك
واللي يدِّيهم هدية
يحتفل وف يوم ميلادك
ينكتب فوق الهدية
ربنا يطوِّل في عمرك
يارب تبقالنا الوزير
..
لمَّا تبقى ف يوم مدير
كله يفرح ليك لفرحك
والجميع يجي ويهنِّي
والدموع تنزل لجرحك
ولحمارك ناس تحنِّي
واللي كان يفتن عليك
جاي بيتودد إليك
يجي ف الأول يبارك
ف العزا ويَّاك يشارك
واللي هيشجَّع فريقك
حمرا الفانلة ولَّا بيضة
واللي هيوسَّع طريقك
يمسك البشكير في مِيضة
واللي يكتب فيك قصيدة
يوصف القلب الكبير
..
واللي هيقولك يا خبرة
انت مولود للإدارة
نظرتك بالصمت عبرة
حكمة مرسومة بجدارة
واللي هيقولك قريبي
وأنت بالتقدير جدير
ياما هتشوف اللئام
واللي دايمًا ليك مرافق
واللي هيعيش الوئام
كل كلمة ليك ينافق
واللي عايز يبقى أقرب
وانت عارف إنه عقرب
واللي كانت مَرًّة ندلة
جاية توصف ذوق لبدلة
تحكي ع الشعر المسرسب والأناقة
ولَّا ريحة العطر سرسب واللباقة
واللي يشحنلك في باقة
وانت قيمة ونجم سيما
والبرنس أنت وأمير
..
ياما هتشوف اللي حاقد
واللي مُحبِط سلبي ناقد
واللي هيسوق ليك معارفه
واللي فاهمه واللي عارفه
رغم حبك للزمايل والجمايل
ناس كتير منك تغير
..
واللي خاصمك يوم يصالحك
واللي يشهد زور لصالحك
واللي يقضي ليك مصالحك
لو تقول النكتة بايخة
كله يضحك” هايبرين”
لو تقول دماغي دايخة
كله يطلع باسبرين
واللي يدعيك يوم طهوره
واللي يقطفلك زهوره
تنكسر عندك زجاجة
كله يجري بحزن باكي
لو تبيض عندك دجاجة
كله بالأفراح يكاكي
واللي يحجزلك قطار
واللي هيجيبلك فطار
واللي هيحاسب في قهوة
واللي يطلبلك عصير
..
ولمَّا تطلع ع المعاش
فجأة تلقى الحال تغيَّر
الكبير يصبح صغيَّر
بص شوف حفلة وداعك
كل مُز ومُزة باعك
واللي هيقول كان دا فاشل
كان روتيني و لص ناشل
واللي كان يسمع كلامك
راح يطنش ليك سلامك
راح تشوف الصورة كاملة
كله كان غش و مجاملة
كله كان تحسين معاملة
مين لجهد الخير تشكَّر ؟!
كله للمعروف تنكًّر
واللي شيلت معاه في أزمة
كان بيمسح جوخ وجزمة
و كنت تعطف يوم عليه
لمَّا تطلع ع المعاش
بكرا يشمت فيك كثير
من ديوان عيش وملح
