( ١ )
يا كاتب الأشعار
مشتاق لضي نهار
إياك تبيع الأمل
أو تمشي فى التيار
كل العيون شايفاك
بتصارع الأمواج
وكتير قلوب عاشقاك
لما وصفت علاج
بالحب والاصرار
يا كاتب الأشعار
( ٢ )
لما الحروف بتهل
بتشد عود مكسور
ترسم جناين فل
تكسر ظلام وشرور
وتغنى للخايفين
غنوة فرح وحنين
والعزم يبقى حديد
ويعيش سنين و سنين
والخوف أكيد ينهار
يا كاتب الأشعار
( ٣ )
طير في الفضا فرحان
شوف الجمال واحكيه
أصل الوطن حيران
قرب وخد بإيديه
واصنع سفينة نوح
واعبر ليالي جروح
وبقوة الإيمان
سافر لأعلى طموح
واهزم سنين أخطار
يا كاتب الأشعار
( ٤ )
كلم نجوع وكفور
كلم نخيل ورمال
كلم جزر وبحور
كلم غصون وجبال
الحق بكرة أكيد
ينشد أغاني العيد
والشمس تبعت نور
والليل يروح لبعيد
والناس تعيش أحرار
يا كاتب الأشعار
