قاللي لابد تبيع ..
حاولت أبيع مبادئي ..بس ما قدرتش أبيع
قاللي مسيرك يوم تضيع..
بين كل أرقام اللي باعوا من زمن
اللي ظهر..و اللي بطن
قلت الوطن
قاللي مفيش لغريب وطن
ولا للعجوز رغبه لشيء
إفهم بقى سر الطريق
إلحق وهاجر م العطش
قبل القطط ما تموء في جوفك..
وانت بتعاني الهزال
بعت العزال لمرابي ..كان خدام لجدك ..
قبل ما يسرق بطاقتك
لاجل يطفي الشمس..
في رحلة محاوله للخروج م القوقعه
رديت ،،شربت لبن ممرر..
من عروق المرضعه
وتعبت جدا يوم ما شفت البدر.. أصبح ضفدعه
و الشعر أصبح سرسعه
و الليل صبح دبابيس.. بتشتي عليا ..
والسكه العويله بدون غطا
والروح كسيره محبطه
وعيال بلون الفحم نايمه معيطه،،
قاللي الشتا عندك شتا غير الشتا
والسيف مسلط من كلاب الأرض
ع القلم اللي عايز حبر ..من كل اتجاه
أنا قلت آه..خدني ومشي
فرجني ع الهدمه الجريئه المشمشي
فوق 1000 جثه ع الشاشات المقرفه
قاللي تمتع بالدفا
شميت في ريحه فورمالين
وسألته دولت يبقوا مين ؟
قاللي يا فاقد حكمه ..
دول الصفوه..شله منتقاه بالدقه..أسياد البلد
إوعى تقول بينهم،، مدد،،..لا يجلدوك
أو يطردوك..من جنه القرش الحرام
إقلع بقى الفكر المصدي والحزام
لحم الجواري البيضه مستنيك.. مع لحم النعام
جرب بقى استمتاع ..برمان الأفاعي و استكين
إنسى بقى الشعر الهجومي.. وكون علاء الدين..
ومصباح الهروب..
للواقع اللي انت كتبت عنه في يوم..
في ألف ديوان،، أليم،،
ربك عليم باالطيبين اللي اختشوا
ثم انتشوا.. في قلب مستنقع ياقوت
أنا قلت مش عايز في حضن قمئ أموت
انا قلت مش عايز أفوت على حيهم
و لا أبقي ليله زيهم
هافضل كنارية حب حاضنه فرع توت
قاللي بداية الموت..
جيوب فاضيه..و ضيقه..واكتئاب
رديت.. في شعري..لعنت في ديل الكلاب
فقفل عليا الباب وسابني.. جريت وراه
شفته بيحرق نفسه ..شفت بعيني..
من جسده اللي داب ويا التراب ..
خارج عشان ينقرني.. ميت مليون غراب
