عمرك حسيت إنك بتجري طول اليوم زي ما تكون في سباق، لكن مش عارف إنت بتجري ليه؟ بتصحى، تشتغل، ترجع تنام، وتعيد تاني من غير ما تحس بأي طعم للحياة؟ الحقيقة اللي مش بنفكر فيها كتير إنك مش هتقدر تزود أيام لحياتك .. لكن تقدر تضيف حياة لأيامك .
السعادة مش حلم بعيد ولا هدف بنجري وراه، السعادة موجودة حوالينا في كل لحظة بنختار نعيشها بجد .. ممكن تكون في لحظة هدوء بينك وبين نفسك، أو في ضحكة من قلبك مع حد بتحبه، أو في إحساس الفخر بعد ما تخلص شغلك وأنت عارف إنك قدمت حاجة مميزة .. السعادة مش محتاجة مجهود كبير، هي في التفاصيل البسيطة اللي بتقرر تشوفها وتعيشها .
في حياتك المهنية أو البيزنس، مش لازم تستنى تحقق الإنجاز الكبير عشان تحس بالفرحة .. كل خطوة صغيرة بتاخدها، كل تحدي بتواجهه، وكل فكرة جديدة بتشوفها بتتحول لواقع .. هي دي اللحظات اللي بتضيف معنى لشغلك .. مشوار النجاح مش مجرد أرقام أو مبيعات، هو رحلة مليانة شغف، تعلم، وإبداع .
كل يوم فيه فرصة إنك تبدأ حاجة جديدة، حتى لو كانت خطوة بسيطة .. افتكر تحتفل بكل إنجاز، مهما كان صغير، لإنه جزء من الرحلة .. حاوط نفسك وسط ناس بتدعمك وبتديك طاقة إيجابية .. خليك مرن ودايمًا حريص إنك تتعلم من التجارب الجديدة، في حياتك وشغلك .
ماتستناش اللحظة المناسبة عشان تحس بالسعادة، إنت اللي بتقرر تصنعها كل يوم بقراراتك وأفعالك .. عيش النهاردة بحب وشغف، وحس بكل لحظة وكأنها أهم لحظة في حياتك .. في النهاية، كل يوم ممكن يبقى يوم مختلف ومليان سعادة .. لو قررت أنت .
بقلم سامية الفقى نائب رئيس تحرير جريدة وموقع العمال والاخبارية
