من حق اى مواطن يترشح طالما تنطبق عليه الشروط اللازمة للترشح وهذا حق دستورى لكل مواطن مصرى على ارض مصر
ومن حق كل ناخب مصرى ايضا له صوت انتخابى ان يختار وينتقى المرشح اللى عايز يمثله فى البرلمان دون اى ضغوط او تجميلات او كذب ونفاق
من حق كل مواطن يختار ممثله فى البرلمان بشرط الامانه فى الاختيار وعدم المجامله فى الاختيار وننسى الجمل المشهورة عندنا من زمان ابن الحته وابن بلدنا وقريبنا وعملى خدمة ده حضر فرحنا وكمان عزانا فى فقيدنا مش هى دى الاسس السليمة فى اختيار من يمثلك وبعدين ترجع تحمل الدولة المسئولية وتضرب كف على كف وتنتظر كمان خمس سنوات على ما تقدر تغير ده ان غيرت لازم الاول نغير انفسنا ونختار صح الصح لان البرلمان هو الطريق الوحيد لتحقيق امال ومطالب الشعب المفروض ان البرلمان اللى هنختارة يحاسب ويراقب الحكومة مش يراقب الشعب المفروض بل المطلوب نختار اعضاء يقفوا بجوار الشعب ويحنوا عليه ويستجيبوا لطلباتة المشروعة مش مصالح شخصية يهتموا بالمصالح العامة للمواطنين بقدر المستطاع
علشان كده واحنا الان فى مرحلة الترشح والاختيار وقبل ما حضرتك وسيادتك تتفضل وتدخل لجان الاقتراع وتدلى بصوتك انك تعرف ان لصوتكم قيمة وان صوتك مؤثر وان صوتك امانة هتتحاسب عليها امام الله لا تجامل ولا تنافق ولا تهادن وضع مصلحة مصر وبلدك وقريتك واولادك اما عينيك حكم ضميرك وانسى العواطف ولو للحظة صغيرة تعطى فيها قرارك المصيرى فى اختيار من يمثلك
طيب عايز تعرف تنتخب مين انتخب المرشح ذو الشخصية القوية المثقف الدارس صاحب الخبرات البرلمانية او الوظيفية اختار المرشح اللى مش منتظر حد يسانده او حزب يرشحة او دولة تحميه وتقدمة للمواطن لانه هيفضل مديون لمن اختاره وهينسى من انتخبه اختار نائب مش تابع لحد ولا فيه حزب بيوجه ولا فرد بيتحكم فيه لانه هيبقى نائب دلدول وامعة لا مؤاخذه فى التعبير لكنها الحقيقة اختار نائب له تاريخ نظيف لا يكون حرامى سابق ولا مرتشى ولا متهم فى قضايا لكن للاسف السابقة الاولى لا تظهر فى الفيش اختار نائب لا يتمسح ويتمسكن لاهل بلدة او لاقربائة المشهورين فى الدعاية اختار مرشح يعتمد على اسمة وسيرته دون غيرها اختار مرشح لا يستخدم اموالة فى نيل الكرسى يعنى صاحب مال سياسى اختار مرشح تثق فى انك هتقابله او تكلمة فى اى وقت اختار مرشح اهلا للثقة والاحترام والتواضع اختار اللى هتثق انك هتعرف نقابله وتشوفة ويسمع لك بعد الانتخابات وبابه مفتوح فى اى وقت لك ولاى حد اختار مرشح يكون له تاريخ نظيف وماضى محترم وجذور واصول اختار المرشح اللى انت عارف انه مش هيستغل الحصانة غلط ولا هيحركه حزب ولا هيتحكم فيه فرد بمعنى اختار مرشح يكون صوته من دماغه مش من دماغ غيرة
البلد محتاجه برلمان قوى وانت واحنا مسئولين امام الله على اختيارنا المهم اختار صح ومترجعش تلطم وتسب وتلعن انت المسئول مش اى حد
مش كده ولا ايه
