أنت فين يا ضمير
بندور عليك من سنين
تايه عنا؟
ولا إحنا اللى عنك تايهين ؟!
وليه كده منك محرومين !
بقينا بالفساد عايشين
وبالرشاوى رايحين جايين
والاجتهاد والعمل مش سائلين
وفى دماغنا مكبرين ومطنشين
وبناء الوطن مش مفكرين
ومن كل حتة ناهبين
ومن كل جيب مرتشين
بعيون بجحين
والكرامة ناسيين،
من غيرك يا ضمير
لو شافنا إبليس هيقول
أنتوا عند مين متعلمين
لأنى عايز أخد عندكم درس
حصة كده ولا حصتين
أصلى بأشوفكم أحس إنى ملاك
وبأنسى إنى إبليس
لأنكم فى الظلم والنفاق عليا متفوقين
يا سلااااام عليكم يا بنى آدميين
لما يغيب عنكم الضمير
تعرفوا تسرقوا الكحل من العين
وأنا إبليس هأبقي عندكم تلميذ
آه شوفت يا ضمير
من غيرك إزاى إحنا عايشين
سايبنا وعايش بس مع مين
والله إنت واحشنا كتير ،
ده إحنا من غيرك ضايعين
، وفى الظلم والطمع عايشين،
نشوف مين زعلك وخلاك تسبنا
وتروح لناس تانيين
ده اللى زعلك نجيبه زاحف على رجليه
وممكن نقطع له إيديه
ونخليه يبكى بدل السنه ميه
والدموع تنزل دم
لأنه ضيع منا أجمل هدية
بتتمتع بيها البشرية،
من غيرك والله نتوه فى الدنيا ديه
ارجع لنا يا افضل هدية
من خالق البشرية
والنبى فكر فينا شوية
ده إحنا جوانا طيبة
بس مستخبية
تعالى إنت ضمان لينا
هتخلينا نبعد عن الشيطان
ونعيش فى أمن وأمان،
ويرجع جوانا من تانى الإنسان.
تخاريف كاتبة
