هشام مبارك يكتب.. أمينة جمعية قتل الأزواج !

– جرالك إيه يا أمينة وبتروحى فين كده كل صبح تختفى شوية وترجعى من غير ماتقوليلى، وإيه المجانص اللى طلعلتلك فجاة دى ياولية؟

– مش قولتلك الولا كمال اشتركلى فى الجيم اللى فى آخر الشارع؟ شكلك كبرت وبتنسي كتيرالأيام دى ياخويا.

–  جيم إيه بس وزفت إيه على دماغك، تكونيش عايزة تلعبى فى الأولمبياد ونفسك فى حتتين دهب ولا فضة؟

– بطل تتريق هو يعنى حرام أروح الجيم واهتم بصحتى؟

– طب جيم عشان صحة سيادتك وفهمناها، ممكن بقي أعرف لابسة أسود ليه فى يومك اللى مش فايت ده؟

– أصلى وأنا راجعة من الجيم عديت عزيت فى عادل جارنا, لهو أنت ماسمعتش  باللي حصله؟مش نحمده مراته دبحته بالساطور وقطعت جتته وحطتها فى 11 شوال؟

– كلام ايه ده وايه الرجالة الخرعة دى؟عموماً اتفضلى اتنيلى شوحيلى حتة كبدة لحسن هفتان وحاموت من الجوع.

– لا ماعطلكش أنا عندى اجتماع مهم دلوقتى يا ابو السيد!

– اجتماع  هههههه الله يحظك يا أمينة,هو انتى اتوظفتى فى الحكومة وكمان بتقوليلى أبو السيد حاف كده!

– أومال عاوزها بغموز؟

– هزرى هزرى شكلك فايقة ورايقة من الجيم اللي كنتى فيه,وعلى كده اجتماع ايه بقي اللى أنتى رايحاله يا أمينة ؟

– اجتماع جمعية قتل الأزواج يا أبو السيد!

– لا يا أمينة ماسمعتش.

– أديك سمعت أصل الستات جابت آخرها خلاص وكل ماراجل يزعل مراته بتموته،الستات ماعدش عندها خلق خلاص للمناهدة والرجالة لا حمد ولا شكرانية وعلى فكرة حتى زبيدة وجليلة أعضاء فى الجمعية دى!

– بتقولى مين لا مش معقول.

– ومش معقول ليه هم مش ستات وطهقانين برضوا؟

– وإيه اللى خلى الستات تفكر تعمل الجمعية دى يا أمينة؟

– الراجل منكم يدخل بيته على وشه غضب الله يشخط وينطر فى الست الغلبانة الشقيانة طول النهار،وهاتك ياطلبات ودلع,وبره بيته مبسوط وبيضحك ويتسرمح مع العوالم ويضيع فلوسه عليهم,الستات قالت مابدهاش بقي, أى راجل يدخل بيته يضايق مراته تدبحه على طول,أو تحرقه أو تسمه, اللى تقدر عليه, المهم تخلص منه وتشفى غليلها، ومش كده وبس!

– خلاص خلاص مش عايز أعرف التفاصيل ,وعلى كده بتدربى على إيه فى الجيم يا كابتن أمينة خلى مجانصك طلعت بالشكل ده تكونيش بترفعى أثقال؟

– أيوه فعلاً بتدرب على رفع الأثقال علشان احتمال قريب كده أشيل كام شوال على يدى!

– ياساتر يارب,بس تصدقى فعلاً عندكوا حق  يا أمينة الرجالة دى ملهومش حق طبعاً يزعلوا ستاتهم ،هو إحنا لينا بركة إلا أنتوا!

– انت شايف كده يا حبيبى؟

– وأى راجل مايشوفش كده يبقى أنطس فى نظره.

– طب عن اذنك بقى لحسن أتاخرت على الاجتماع وأنا أمينة الجمعية.

– طب ممكن تاخدينى معاكى ولو حتى أشيلك الشنطة !.

– مفيش مانع بس بشرط واحد!

– شرط ايه ياختى تحت أمرك.

– قدام السادة عضوات الجمعية انت سيد وبس!

– مفهوم مفهوم وانتى طبعا أمينة وبس؟

– لا لا أنا الست أمينة لو سمحت يا سيد !

–    طب لو قولتلك إن الكلام ده مش عاجبنى؟

–  لو مش عاجبك يبقى تلم هدومك وعلى أمك يا سى السيد قصدى يا سيد وبس!