كُلُّه ولا سيدنا النَّبي
الأرض تصرخ
والمنابر تشتكي
والروح بترخص
والرجولة تِنْتِخِي
كله ولا سيدنا النَّبي
مسلم أنا
وإسمع كلامي يا صبية ويا صَبِي
إن كُنْت شرقي
أو كُنْت غربي
أو كان لسانك يَعْرُبي
صل علي “طه” الحبيب
وامشي في دربُه تِهْتِدِي
كله ولا سيدنا النَّبي
مُسْلم أنا متربي علي حب النَّبي
قرآني دستُوري
والكعبة قِبلة
والفضيلة مذهبي
كل البشر عندي سواء
ولا فرق بين صِيني و كِيني
ولا بين اميركي او بِنِينِي
او حتي عربي يَثْربِي
الفرق في قدر الإيمان
قدر احترامه للنبي
مسلم انا وبصوم وأصلي
مسلم انا أضحك و اغني
مسلم انا وبحب ديني
مسلم انا وبحب فني
مسلم انا وبحب غيري
مسلم انا أحسن في ظني
مسلم أنا
وبعيش حياتي حسب الشريعة
الفرض فرض والسُنَّة سُنَّة
مسلم انا وبخاف جهنم
مسلم انا طمعان في جنى
مسلم وعاشق للحياة
أما الشهادة مطلبي
مسلم انا دستوري قرآني
مسلم انا وربي سلطاني
مسلم انا والسِلم عنواني
مسلم انا في الحق تلقاني
مسلم انا والصدق في لساني
مسلم انا و العيبة تعصاني
مسلم انا عزي في إيماني
انهي عن المنكر
وأدل علي المعروف
وأبدر تقاوي الخير
مطرح ما عيني تشوف
عمري ما اخاف الموت
من ربي بس الخوف
في الحق ما ارضي السكوت
لو قطعتني السيوف
وان شوفت ضيم ابكي
وبكايا إنساني
واقف علي باب النبي
وقفة يتيم الأم
حاني الضلوع للأرض
أفرد كفوفي واضم
والدمع مالي العين
والآه بتطلع سُم
قوم يارسول الله
انظر الينا وطُل
قوم يارسول الله
شتت رياح الذل
قوم يارسول الله
الامه حالها يغم
قوم يارسول الله
وإدعي لرب العباد
نصره علينا يهل
مَسّري النبي في الارض بيعاني
والأقصي ينده يارسول الله
اذن اذان الفجر
قوم إم الصلاه تاني
وأقرأ تبارك
وسبح ربنا الاعلي
وإدعي في سجودك
يهلك الجاني
الأمة لا حول ولا قوة
والجرح نازف
والصديد جوة
اولادها في بحر الشتات تاهوا
والغازي ساكن في الديار جوة
اسفي علي الأمة
مش قادرة تتوحد
زي السحاب في السما
كل اما قالوا التم
يبعد و يتبدد
أحزانها مالها حصر
تخلص و تتجدد
شاطره بتسحل عيالها
لكن مع الأجنبي
بتلين وتتودد
تنهش ضلوعها السباع
وهي زي الغزال
تصرخ وتتنهد
كل الأمم في السباق
نازله بترمح رمح
وغيرنا يصنع صاروخ
وإحنا بنصنع رمح
وغيرنا يركب سفن
وإحنا بنحبي حبي
كله ولا سيدنا النَّبي
