ولولا دا يوم ماكنتش جيت
ولا مريت..
على الدنيا
ولا حطيت
على ارض الاسى الناشفة
زرعنا فَرْحِنا فيها
جنينا نبتنا أشواك
وأرض تداوى بدموعها
براح بيعانى م الاشواق
ولا مشيت الامل مسافات
وانا بستنى طرح العمر
ضل وغيط
ولا عديت
على البحر اللى امواجه
تغرقنى ..
وتبعدنى
والاقينى بلا نفسى ..
وعن روحى خلاص شطيت
ولا علَّيت
خطاوى فوق جبال الصبر
وعدا اليوم كانه دهر
وكان الفجر راسم خيط
وقلت ياريت
تودعنى
سنينى العوج
وتطرح أرضنا فرحة
وتتفتح زهور العمر
على غنوة بأحلامنا
كتبناها ..
واحنا صغار
نسينا اللحن ونسينا
حروف البيت
لقينا شمسنا غابت
وجانا الليل
يلم الباقى م الاحلام
ويدفنها ف صحن الروح
لا فجر يلوح
وقنديلها
خلص م الزيت
وبكرة حروح
منين ماجيت
