مش ؛
كل الناس الليي بتقابلهم في حياتك واحد ، وما بنفع تشرب ( أكامول) تسكّن فيه وجع قلبك ، والدنيا هاي خبّازها بجوع ، ودكتورها بمرض ، والليي بعمل معك شغلة حلوة أو عاطلة ، رح يكرّرها مليون مرّة .
وقد ما تجور الدنيا عليك ، خليك صاحب مبدأ وثقة ، وإعمل الليي بناسبك بس ، والمكان الليي بتفقد فيه شغفك وسعادتك بدكش إياه .
ما تضمن ولا تآمن بأي علاقة بشرية ، غير توفيق ربنا عز وجل .
لا تحكي عِشرة ، ولا عيش وملح ، ولا أسرار
ولا دخلنا بيوت بعض ، ولا بينا مصالح ومشاريع .
وإدعي ربنا يديم علاقتك بالناس ، الليي تستاهل تكون معهم ، وبتستاهل يكونوا هم حواليك وبجنبك وظهرك .
العلاقة الحلوة بيبان تأثيرها على ملامحنا ، على طلاّتنا ، على كلماتنا ، على ضحكاتنا ، وتصالحنا مع غيرنا ، ومع حالنا .
كون حريص تعيش أيامك ، مع حدا يزيدك بهجة وفرح ، مش يقتلك ويطفيك ، ويهدك .
ما تتأقلم مع ظروف بتهد حيلك ، وتوسع الرقعة الليي بنص قلبك ، إسعى للهروب من كل شي بإذيك ، لتحافظ على هالشي المتبقي منك ..
خربوشة مسا ..!!
