يا خلق هوه خارج معاش..
ما بحبهاش الكلمة دى ما بحبهاش..
يعنى إيه كلمة معاش
ده انت بالذات اللى عاش
ده انت غربلت الليالى
ده انت هننت الأمانى
وابتسمت لحلم لسّْه ما ابتداش..
وفرشت عمرك ع الطريق
الكل عدى ماهمناش
وياك فهمنا المسألة.. وازاى نهد المشكلة
ما تهدناش..
ما بحبهاش الكلمة دى.. ما بحبهاش
يعنى إيه كلمة معاش
ده انت بالذات اللى عاش
ياما طمنت اللى خايف
حتى لو فى الرأى خالف
امتى ضاع الحق .. قدامك بلاش
وزرعت قلبك ع الحدود
وحصدت لقمة ما كلتهاش
ووقفت قدام الديابة
وحرمتهم دم الغلابة
المطحونين بالانفتاح والانكماش
ما بحبهاش الكلمة دى ما بحبهاش
يا خلق هوه.. إيه المعاش
أنا لسّْه دورى ما انتهاش
يعنى أعد كراسى بيتى !
ولا أصاحب ضل حيطى
ولا أدخّل كل أفكارى الجراش !
يا خلق هوه.. إيه المعاش
أنا ضى روحى ما انطفاش
لسّْه فى الأنفاس أجل
لسّْه فيه عزم وأمل
لسّْه فى القلب انتفاضة وانتعاش..
يا خلق هوه.. إيه المعاش
هيه لقمة أو مترين قماش ؟
القضية حاجة تانية
حاجة فارقة فى كل ثانية
خدتوا أحلى عمرى قسط
ليه بترموا الباقى كاش
ما بحبهاش الكلمة دى ما بحبهاش
